ബംഗളൂരു: ജൂൺ 26 വെള്ളിയാഴ്ച മുതൽ ബംഗളൂരു നിവാസികൾക്ക് മൂന്ന് ദിവസത്തെ നീണ്ട വാരാന്ത്യമാണ് (Long Weekend) ലഭിക്കുന്നത്. മുഹറം പ്രമാണിച്ചുള്ള അവധി കൂടി വരുന്നതോടെ ഈ ദിവസങ്ങളിൽ ചെറിയ യാത്രകൾ പ്ലാൻ ചെയ്യാൻ മികച്ച അവസരമാണ് ഒരുങ്ങിയിരിക്കുന്നത്. എന്നാൽ, സംസ്ഥാനത്ത് കാലവർഷം കനക്കുന്ന സാഹചര്യത്തിൽ യാത്രകൾ പ്ലാൻ ചെയ്യുമ്പോൾ അതീവ ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകുന്നു. യാത്ര തിരിക്കും മുൻപ് ചന്ദ്രദർശനം സംബന്ധിച്ച പ്രാദേശിക അറിയിപ്പുകൾ കൂടി ശ്രദ്ധിക്കുന്നത് നന്നായിരിക്കും.
മലയാളി സഞ്ചാരികൾ അടക്കം ധാരാളമായി എത്തുന്ന കുടക് (Coorg), ചിക്കമംഗളൂരു ജില്ലകളിൽ വരും ദിവസങ്ങളിൽ കനത്ത മഴയുണ്ടാകുമെന്ന് ഇന്ത്യൻ കാലാവസ്ഥാ നിരീക്ഷണ കേന്ദ്രം (IMD) മുന്നറിയിപ്പ് നൽകിയിട്ടുണ്ട്. മഴക്കാലത്ത് ഇവിടങ്ങളിലെ മലയോര റോഡുകളിൽ വഴുക്കലുണ്ടാകാനും തെന്നി വീഴാനും സാധ്യതയുള്ളതിനാൽ വാഹനയാത്രികർ പ്രത്യേകം ശ്രദ്ധിക്കണം.
പ്രസിദ്ധമായ ആഗുംബെ, ചാർമാടി ഘട്ട് മേഖലകളിലൂടെ യാത്ര ചെയ്യുന്നവർ കടുത്ത ജാഗ്രത പാലിക്കണമെന്ന് ഐഎംഡി നിർദ്ദേശിക്കുന്നു. മുൻവർഷങ്ങളിൽ അപകടങ്ങൾ ഒഴിവാക്കാനായി കനത്ത മഴയുള്ള സമയങ്ങളിൽ ആഗുംബെയിൽ വലിയ വാഹനങ്ങൾക്ക് പ്രാദേശിക അധികൃതർ നിയന്ത്രണം ഏർപ്പെടുത്താറുള്ള കാര്യം ഓർക്കണമെന്നും, കാലാവസ്ഥാ പ്രവചനങ്ങൾ വിലയിരുത്തി മാത്രം യാത്രകൾ നിശ്ചയിക്കണമെന്നും അധികൃതർ കൂട്ടിച്ചേർത്തു.
#kudaku#muharram#holidays#travelling
