ബിഗ് ബോസ് മലയാളം സീസൺ 7-ലൂടെ പ്രേക്ഷകരുടെ പ്രിയങ്കരികളായി മാറിയ ‘പട്ടായ ഗേൾസ്’ എന്നറിയപ്പെടുന്ന അനുമോൾ, ആദില, നൂറ എന്നിവർ സഹമത്സരാർത്ഥിയായിരുന്ന രേണു സുധിയെ സന്ദർശിച്ചു. കാൻസർ ബാധിതയായി കഠിനമായ ചികിത്സാ ഘട്ടങ്ങളിലൂടെ കടന്നുപോകുന്ന രേണുവിന് വലിയൊരു ആശ്വാസവും സന്തോഷവുമായിരുന്നു പ്രിയ സുഹൃത്തുക്കളുടെ ഈ സന്ദർശനം.
മൂവരും തന്നെ കാണാനെത്തിയ വിവരം രേണു സുധി തന്നെയാണ് സോഷ്യൽ മീഡിയയിലൂടെ ആരാധകരുമായി പങ്കുവെച്ചത്. “അനുമോൾ, ആദില, നൂറ.. ഇന്നലെ എന്നെ കാണാൻ വന്നപ്പോൾ.. ഞാൻ ഒരുപാട് ഹാപ്പി ആയി,” എന്ന കുറിപ്പോടെ നാലുപേരും ഒരുമിച്ചുള്ള ചിത്രം രേണു ഇൻസ്റ്റാഗ്രാമിൽ പോസ്റ്റ് ചെയ്യുകയായിരുന്നു. ‘വാഴ 2’ എന്ന ചിത്രത്തിലെ ഒരു ഗാനവും ഇതോടൊപ്പം താരം പങ്കുവെച്ചിട്ടുണ്ട്. അണുബാധ ഏൽക്കാതിരിക്കാനുള്ള മുൻകരുതലിന്റെ ഭാഗമായി നാലുപേരും മാസ്ക് ധരിച്ചാണ് ചിത്രത്തിലുള്ളത്.
ചിത്രം സോഷ്യൽ മീഡിയയിൽ വൈറലായതോടെ രേണുവിന് പിന്തുണയുമായി നിരവധി ആരാധകരാണ് കമന്റുകളുമായി എത്തിയിരിക്കുന്നത്. രേണുവിന്റെ ആരോഗ്യസ്ഥിതിയിൽ ആശങ്കയറിയിച്ച ആരാധകർ, ഈ മനോഹര നിമിഷങ്ങൾ ശരീരത്തിന്റെ പരിപൂർണ്ണ സൗഖ്യത്തിന് വഴിതുറക്കട്ടെ എന്ന് പ്രാർത്ഥിക്കുന്നതായി കുറിച്ചു.
“ആർക്കും മറുപടി കൊടുക്കാൻ പോകരുത്, ആരോഗ്യം നോക്കി ശക്തമായി തിരിച്ചു വരണം. ടെൻഷൻ പാടില്ല, മനസ്സിൽ വിഷമമുള്ള കാര്യങ്ങളെല്ലാം മറന്നുകളയുക. മൈൻഡ് സ്ട്രോങ്ങ് ആയിരിക്കണം, എങ്കിൽ മാത്രമേ വേഗം തിരിച്ചു വരാൻ സാധിക്കൂ. പ്രാർത്ഥനകൾ ഒപ്പമുണ്ട്.” – എന്നിങ്ങനെ പോകുന്നു ആരാധകരുടെ സ്നേഹം നിറഞ്ഞ കമന്റുകൾ.
ബിഗ് ബോസ് ഷോയ്ക്ക് മുൻപ് തന്നെ രേണു സുധിയുമായി അടുത്ത സൗഹൃദമുണ്ടായിരുന്ന വ്യക്തിയാണ് അനുമോൾ. ഷോയ്ക്കുള്ളിലും ഇരുവരുടെയും മനോഹരമായ സൌഹൃദ നിമിഷങ്ങൾ പ്രേക്ഷകർ കണ്ടതാണ്. അനുവിലൂടെയാണ് ആദിലയും നൂറയും രേണുവിനെ പരിചയപ്പെടുന്നതും അടുത്ത സുഹൃത്തുക്കളാകുന്നതും. ഷോയ്ക്ക് ശേഷം ഇവർക്കിടയിൽ ചില ചെറിയ പിണക്കങ്ങൾ ഉണ്ടായിരുന്നെങ്കിലും അതെല്ലാം മറന്ന് ഇവർ വീണ്ടും ഒന്നിക്കുകയായിരുന്നു. കാൻസർ ചികിത്സയുടെ ഭാഗമായി കഠിനമായ ശാരീരിക ബുദ്ധിമുട്ടുകളിലൂടെ കടന്നുപോകുന്ന രേണുവിനെ നെഞ്ചോട് ചേർക്കാൻ പ്രിയ കൂട്ടുകാരികൾ എത്തിയത് സോഷ്യൽ മീഡിയയിലും വലിയ കൈയടിയാണ് നേടുന്നത്.
