കൊച്ചി: കഴിഞ്ഞ കുറച്ചുനാളുകളായി സോഷ്യൽ മീഡിയയിൽ ഏറെ ചർച്ച ചെയ്യപ്പെട്ട കുടുംബവിവാദങ്ങളിൽ ഒടുവിൽ പ്രതികരണവുമായി നടി അഹാന കൃഷ്ണയുടെ അമ്മയും ഇൻഫ്ലുവൻസറുമായ സിന്ധു കൃഷ്ണ. അച്ഛന്റെ മരണശേഷം താനും കുടുംബവും അമ്മയെ നോക്കുന്നില്ലെന്ന വസന്തയുടെയും സഹോദരീപുത്രി തൻവിയുടെയും ആരോപണങ്ങൾക്കാണ് സിന്ധു കൃഷ്ണ ഇപ്പോൾ ഔദ്യോഗികമായി മറുപടി നൽകിയിരിക്കുന്നത്. തന്റെ യൂട്യൂബ് ചാനലിലൂടെയായിരുന്നു അവരുടെ പ്രതികരണം.
തങ്ങളെ വ്യക്തിപരമായി അറിയുന്നവർക്ക് സത്യാവസ്ഥ എന്തെന്ന് ബോധ്യമുണ്ടെന്നും പൊതുജനത്തിന് മുന്നിൽ ഒന്നും തെളിയിക്കാൻ താൻ ആഗ്രഹിക്കുന്നില്ലെന്നും സിന്ധു കൃഷ്ണ വ്യക്തമാക്കി.
വിവാദങ്ങളുമായി ബന്ധപ്പെട്ട് തനിക്ക് വിശദീകരിക്കാനും തെളിയിക്കാനുമുള്ള എല്ലാ കാര്യങ്ങളും മൊബൈലിലുണ്ട്. എന്നാൽ കുടുംബത്തിന്റെ അന്തസ്സ് മുൻനിർത്തി അതൊന്നും ഒരിക്കലും പൊതുമധ്യത്തിൽ പങ്കുവെക്കാൻ ആഗ്രഹിക്കുന്നില്ല. 2021 മുതൽ യൂട്യൂബിൽ നിന്ന് ലഭിച്ചുതുടങ്ങിയ വരുമാനം മുഴുവൻ സ്വന്തം മാതാപിതാക്കളുടെ ആവശ്യങ്ങൾക്കായാണ് ചെലവഴിച്ചത്. ഇതിന് ഭർത്താവ് കൃഷ്ണകുമാറോ മക്കളോ ഒരിക്കലും എതിരുനിന്നിട്ടില്ല. സട്രോക്കും സർജറിയും കഴിഞ്ഞ് അസുഖബാധിതനായിരുന്ന അച്ഛനെ മരണത്തിന്റെ തലേദിവസം വരെ മികച്ച രീതിയിൽ പരിചരിക്കാൻ സാധിച്ചിട്ടുണ്ട്. താൻ ചെയ്ത കാര്യങ്ങൾ ആരെയും കാണിക്കാൻ വേണ്ടിയുള്ളതായിരുന്നില്ല. തനിക്കെതിരെ ആരോപണങ്ങൾ ഉന്നയിച്ച അമ്മയ്ക്കും സഹോദരിയുടെ മകൾക്കും എല്ലാവിധ ആശംസകളും നേരുന്നു. അവർക്ക് എന്ത് സഹായം വേണമെങ്കിലും ഏത് സമയത്തും തന്നെ സമീപിക്കാമെന്നും സിന്ധു കൂട്ടിച്ചേർത്തു.
‘വിശദീകരണങ്ങൾ നൽകാൻ താല്പര്യമില്ല’
ഇതൊരു ദിവസത്തെ പ്രശ്നമല്ലെന്നും ഏറെക്കാലമായി കുടുംബത്തിൽ തുടരുന്ന കാര്യങ്ങളാണെന്നും സിന്ധു കൃഷ്ണ വിഡിയോയിൽ പങ്കുവെച്ചു.
“ഞാൻ എന്റെ മാതാപിതാക്കൾക്കായി എന്താണ് ചെയ്തിട്ടുള്ളതെന്ന് ലിസ്റ്റ് ഇടാനില്ല. വിശ്വസിക്കുന്നവർ വിശ്വസിച്ചാൽ മതി, എല്ലാത്തിനും പിന്നിൽ കൃത്യമായ അജണ്ടകളുണ്ട്.”
സമാധാനമാണ് താൻ എപ്പോഴും ആഗ്രഹിക്കുന്നതെന്നും, അത് നഷ്ടപ്പെടുമ്പോൾ നിശബ്ദയായി മാറി നിൽക്കുകയാണ് പതിവെന്നും പറഞ്ഞ സിന്ധു, സമയത്തിലൂടെ എല്ലാം പരിഹരിക്കപ്പെടുമെന്ന പ്രതീക്ഷയോടെയാണ് വിഡിയോ അവസാനിപ്പിച്ചത്.
