സിനിമകളുടെ തിരക്കുകളിൽ നിന്നും ചെറിയൊരു ഇടവേളയെടുത്ത് അമേരിക്കയിൽ ലോകകപ്പ് ഫുട്ബോൾ ലഹരിയിലാണ് സൂപ്പർതാരം മോഹൻലാൽ. തരുൺ മൂർത്തി സംവിധാനം ചെയ്യുന്ന തന്റെ പുതിയ ചിത്രം ‘അതിമനോഹര’ത്തിന്റെ ഷെഡ്യൂൾ ബ്രേക്കിലാണ് താരം. ഇതിനിടയിൽ യൂറോപ്യൻ സ്റ്റേജ് ഷോ പര്യടനവും പൂർത്തിയാക്കിയ ശേഷമാണ് മോഹൻലാൽ ലോകകപ്പ് കാണാനായി അമേരിക്കയിൽ എത്തിയത്.
ഇപ്പോഴിതാ, അമേരിക്കയിൽ നിന്നും താരം സോഷ്യൽ മീഡിയയിൽ പങ്കുവെച്ച പുതിയൊരു ചിത്രമാണ് ആരാധകർ ഏറ്റെടുത്തിരിക്കുന്നത്. സ്റ്റൈലിഷ് വെസ്റ്റേൺ കൗബോയ് ഗെറ്റപ്പിലാണ് ചിത്രത്തിൽ ലാലേട്ടൻ ഉള്ളത്. കൗബോയ് ഹാറ്റും അതോടൊപ്പം എംബ്രോയ്ഡറി ചെയ്ത വൈറ്റ് ഫുൾ സ്ലീവ് ഷർട്ടും ധരിച്ച താരത്തിന്റെ ചിത്രം ഇതിനോടകം തന്നെ സോഷ്യൽ മീഡിയയിൽ തരംഗമായി മാറിക്കഴിഞ്ഞു.
കഴിഞ്ഞ രണ്ട് സെമിഫൈനൽ മത്സരങ്ങളും നേരിട്ട് കാണാൻ മോഹൻലാൽ ഗാലറിയിൽ എത്തിയിരുന്നു. അവസാനം നടന്ന ആവേശകരമായ അർജന്റീന-ഇംഗ്ലണ്ട് സെമിഫൈനൽ മത്സരം കാണാൻ മോഹൻലാലിനൊപ്പം ആന്റണി പെരുമ്പാവൂരും ഉണ്ടായിരുന്നു. മത്സരശേഷം അർജന്റീനിയൻ ആരാധകരുടെ ആഹ്ലാദപ്രകടനങ്ങൾ ഗാലറിയിലിരുന്ന് താരം കൗതുകത്തോടെ വീക്ഷിക്കുന്നതിന്റെ വീഡിയോയും ഇതിനോടകം ശ്രദ്ധ നേടിയിട്ടുണ്ട്. മോഹൻലാലിന് പുറമെ മലയാളി താരം ഫഹദ് ഫാസിലും ഈ സെമിഫൈനൽ പോരാട്ടം കാണാൻ ഗാലറിയിൽ എത്തിയിരുന്നു.
ഫുട്ബോൾ പ്രേമികൾ കാത്തിരിക്കുന്ന ലോകകപ്പ് ഫൈനൽ വരും തിങ്കളാഴ്ച (തിയതി 20) ഇന്ത്യൻ സമയം അർദ്ധരാത്രി കഴിഞ്ഞ് 12.30-ന് നടക്കും. നിലവിലെ ചാമ്പ്യന്മാരായ അർജന്റീനയും യൂറോപ്യൻ കരുത്തരായ സ്പെയിനും തമ്മിലാണ് കിരീടത്തിനായുള്ള കലാശപ്പോരാട്ടം. ന്യൂയോർക്ക്-ന്യൂജേഴ്സി സ്റ്റേഡിയത്തിലാണ് ഫൈനൽ പോരാട്ടം അരങ്ങേറുന്നത്. പ്രിയ താരം മോഹൻലാലും ഫൈനൽ മത്സരത്തിന് ഗാലറിയിലുണ്ടാകുമെന്ന പ്രതീക്ഷയിലാണ് ആരാധകർ.
