കോഴിക്കോട്: സംസ്ഥാനത്ത് സ്വർണവിലയിൽ വീണ്ടും വർധനവ്. പവന് 560 രൂപയും ഗ്രാമിന് 70 രൂപയുമാണ് ഇന്ന് വർധിച്ചത്. ഇതോടെ ഒരു പവൻ സ്വർണത്തിന്റെ വില 1,05,080 രൂപയായി ഉയർന്നു. 13,135 രൂപയാണ് ഒരു ഗ്രാം സ്വർണത്തിന്റെ ഇന്നത്തെ വില. ഇന്നലെ പവന് 560 രൂപ കുറഞ്ഞിരുന്നു. ഇതിന് പിന്നാലെയാണ് കുറഞ്ഞ അതേ തുക ഇന്ന് വീണ്ടും വർധിച്ചിരിക്കുന്നത്.
ആഗോള വിപണിയിൽ ദൃശ്യമായ നേരിയ വിലവർധനവാണ് ആഭ്യന്തര വിപണിയിലും പ്രതിഫലിച്ചത്. അന്താരാഷ്ട്ര വിപണിയിൽ സ്വർണവ്യാപാരം ക്ലോസ് ചെയ്തത് നേട്ടത്തിലാണ്. ട്രോയ് ഔൺസിന് 29.73 ഡോളർ വർധിച്ച് 4,017 ഡോളർ എന്ന നിരക്കിലാണ് നിലവിൽ ആഗോള വിപണിയിൽ സ്വർണവില. വെള്ളി വില ഔൺസിന് 55.9 ഡോളർ എന്ന നിലയിലുമുണ്ട്.
ഈ മാസത്തിന്റെ തുടക്കത്തിൽ കേരളത്തിൽ 1,03,240 രൂപയായിരുന്നു പവൻ വില. പിന്നീട് വില കുതിച്ചുയർന്ന് 1,07,800 രൂപ വരെ എത്തിയിരുന്നു. എന്നാൽ പശ്ചിമേഷ്യയിൽ വീണ്ടും യുദ്ധസമാനമായ സംഘർഷങ്ങൾ ആരംഭിച്ച പശ്ചാത്തലത്തിൽ ആഗോള വിപണിയിലുണ്ടായ അസ്ഥിരതകളെത്തുടർന്ന് വില താഴേക്ക് വരികയായിരുന്നു. അതിനുശേഷമാണ് ഇപ്പോൾ വീണ്ടും വിലയിൽ നേരിയ വർധനവ് രേഖപ്പെടുത്തിയിരിക്കുന്നത്.
