മൊബൈൽ ഫോണുകളിൽ പലവിധ ആവശ്യങ്ങൾക്കായി കണ്ണുമടച്ച് ആപ്ലിക്കേഷനുകൾ ഡൗൺലോഡ് ചെയ്യുന്നവർ ജാഗ്രതൈ! എഡിറ്റിങ്ങിനും ഗെയിമിങ്ങിനുമായി ഇൻസ്റ്റാൾ ചെയ്യുന്ന ആപ്പുകൾ നിങ്ങളുടെ ഫോണിനും സമ്പാദ്യത്തിനും വലിയ രീതിയിൽ പണി തന്നേക്കാമെന്നാണ് ടെക് വിദഗ്ധർ നൽകുന്ന മുന്നറിയിപ്പ്. യഥാർത്ഥ പണം വെച്ചുകൊണ്ടുള്ള റമ്മി, ടീൻ പാട്ടി തുടങ്ങിയ ഓൺലൈൻ ഗെയിമിങ് ആപ്പുകൾക്ക് രാജ്യത്ത് നേരത്തെ തന്നെ വിലക്കേർപ്പെടുത്തിയിട്ടുള്ളതാണ്. എന്നിട്ടും ഇത്തരം ആപ്പുകൾ ഫോണിൽ സൂക്ഷിച്ചിട്ടുണ്ടെങ്കിൽ എത്രയും വേഗം അവ ഡിലീറ്റ് ചെയ്യണമെന്നാണ് വിദഗ്ധർ വ്യക്തമാക്കുന്നത്.
ചെറിയ രീതിയിലുള്ള ക്യാഷ് ബാക്കുകളും ബോണസുകളും വാഗ്ദാനം ചെയ്താണ് റമ്മി ആപ്പുകൾ ഉപയോക്താക്കളെ ആകർഷിക്കുന്നത്. എന്നാൽ ഇവ ഉപയോഗിച്ചു തുടങ്ങാൻ വലിയ തുകകൾ ചിലവഴിക്കേണ്ടി വരുന്നു. കളിച്ച് പണം നഷ്ടപ്പെടുമ്പോൾ, അത് തിരിച്ചുപിടിക്കാനുള്ള മരണവെപ്രാളത്തിൽ വീണ്ടും പണം മുടക്കി കളിക്കുന്നത് കൂടുതൽ വലിയ കടക്കെണിയിലേക്കും സാമ്പത്തിക തകർച്ചയിലേക്കും ഉപയോക്താക്കളെ എത്തിക്കും.
മിക്ക ഓൺലൈൻ കാർഡ് ഗെയിമിങ് ആപ്പുകളും ഫോണിലെ കോൺടാക്ട്സ്, സ്റ്റോറേജ്, ലൊക്കേഷൻ എന്നിവയുടെ ആക്സസ് പെർമിഷൻ ലഭിച്ചാൽ മാത്രമേ തുറക്കാൻ സാധിക്കൂ. അജ്ഞാതവും വിശ്വസനീയമല്ലാത്തതുമായ ഇത്തരം ആപ്പുകൾക്ക് പെർമിഷൻ നൽകുന്നതിലൂടെ നിങ്ങളുടെ അതീവ രഹസ്യമായ സ്വകാര്യ വിവരങ്ങളാണ് അപകടത്തിലാകുന്നത്. ചില തട്ടിപ്പ് ആപ്പുകൾ വാഹന-ബാങ്ക് വിവരങ്ങൾ വരെ ചോദിക്കാറുണ്ട്. ചോദിക്കുന്നതെല്ലാം കണ്ണുമടച്ച് നൽകുന്നത് വഴി ഫിഷിങ് പോലുള്ള ഗുരുതരമായ സൈബർ തട്ടിപ്പുകൾക്ക് നമ്മൾ തന്നെ ഇരയായി മാറുകയാണ്.
ഉപയോക്താക്കളെ വീണ്ടും വീണ്ടും കളിയിലേക്ക് ആകർഷിക്കുന്ന തരത്തിലാണ് ഈ ആപ്പുകളുടെ അൽഗോരിതം ക്രമീകരിച്ചിരിക്കുന്നത്. ഇത് കുട്ടികളിലും യുവാക്കളിലും ആഴമേറിയ അഡിക്ഷൻ (ലഹരി) ഉണ്ടാക്കുന്നു. ഇത് പിന്നീട് കടുത്ത മാനസിക പിരിമുറുക്കങ്ങളിലേക്കും മറ്റ് മാനസിക ബുദ്ധിമുട്ടുകളിലേക്കും നയിക്കുമെന്നും വിദഗ്ധർ ഓർമ്മിപ്പിക്കുന്നു.
പണ്ട് ഡൗൺലോഡ് ചെയ്ത് ഉപയോഗിക്കാതെ കിടക്കുന്ന ഇത്തരം ആപ്പുകൾ ഫോണിലുണ്ടെങ്കിൽ പോലും അവ എത്രയും വേഗം അൺഇൻസ്റ്റാൾ ചെയ്യുക എന്നതാണ് പ്രധാന വഴി. ഏതൊരു ആപ്പ് ഇൻസ്റ്റാൾ ചെയ്യുന്നതിന് മുൻപും അതിന്റെ റിവ്യൂകൾ, ഡെവലപ്പർ വിവരങ്ങൾ, ആപ്പ് ആവശ്യപ്പെടുന്ന പെർമിഷനുകൾ എന്നിവ കൃത്യമായി പരിശോധിക്കണം. പ്ലേ സ്റ്റോർ, ആപ്പ് സ്റ്റോർ പോലുള്ള ഔദ്യോഗിക പ്ലാറ്റ്ഫോമുകളിൽ നിന്ന് മാത്രം ആപ്പുകൾ ഇൻസ്റ്റാൾ ചെയ്യുന്നത് നിങ്ങളുടെ സുരക്ഷ ഉറപ്പാക്കാൻ സഹായിക്കും.
