കേരളം കനത്ത മഴക്കെടുതി നേരിടുന്നതിനിടെ മുഖ്യമന്ത്രി വി.ഡി. സതീശൻ ജ്വല്ലറി ഉദ്ഘാടന ചടങ്ങിൽ പങ്കെടുത്തത് വലിയ രാഷ്ട്രീയ വിമർശനങ്ങൾക്ക് വഴിവെച്ചിരുന്നു. ഇതിന്റെ ചിത്രങ്ങളും വീഡിയോകളും സോഷ്യൽ മീഡിയയിൽ വൈറലായതിന് പിന്നാലെ, ചടങ്ങിൽ മുഖ്യമന്ത്രിയോടൊപ്പം യുവനടി ഐശ്വര്യ ചന്ദ്രൻ ഫോട്ടോയെടുക്കുന്ന വീഡിയോയ്ക്ക് താഴെ നടി തെസ്നി ഖാൻ കുറിച്ച കമന്റാണ് ഇപ്പോൾ പുതിയ ചർച്ചകൾക്ക് തുടക്കമിട്ടിരിക്കുന്നത്.
പൊതുവേദികളിൽ മാന്യമായ വസ്ത്രധാരണം വേണമെന്നും മുഖ്യമന്ത്രി വരുന്ന സദസ്സിൽ അത്തരം കാര്യങ്ങൾ ശ്രദ്ധിക്കണമെന്നുമാണ് തെസ്നി ഖാൻ കമന്റിലൂടെ ചൂണ്ടിക്കാട്ടിയത്.
“എനിക്ക് പലപ്പോഴും തോന്നുന്ന ഒരു കാര്യമാണ്. തെറ്റാണോ ശരിയാണോ എന്ന് അറിയില്ല. ഇപ്പോഴത്തെ ജനറേഷൻ പിള്ളേർക്ക് എങ്ങനെ വേണമെങ്കിലും നടക്കാം, അതിനുള്ള പെർമിഷനും അവകാശവും ഉണ്ട്. പക്ഷേ ഒരു മുഖ്യമന്ത്രി വരുന്ന സദസ്സിൽ, ഒരു നല്ല സ്റ്റാൻഡേർഡ് ഉള്ള സദസ്സിൽ മാന്യമായി ഡ്രസ്സ് ധരിച്ചുവരുകയാണെങ്കിൽ അതൊരു നല്ല കാര്യമായിരുന്നു,” തെസ്നി ഖാൻ കുറിച്ചു.
തെസ്നി ഖാന്റെ കമന്റിന്റെ സ്ക്രീൻഷോട്ടുകൾ വൈറലായതോടെ സോഷ്യൽ മീഡിയ രണ്ട് തട്ടിലായിരിരിക്കുകയാണ്.
-
പിന്തുണയ്ക്കുന്നവരുടെ വാദം: പൊതുവേദികളിലും മുതിർന്ന രാഷ്ട്രീയ നേതാക്കൾ എത്തുന്ന ചടങ്ങുകളിലും ഡ്രസ്സ് കോഡ് അല്ലെങ്കിൽ മാന്യമായ വസ്ത്രധാരണം പാലിക്കേണ്ടത് വ്യക്തിത്വത്തിന്റെ ഭാഗമാണെന്നും തെസ്നി ഖാൻ പറഞ്ഞതിൽ 100 ശതമാനം ശരിയുണ്ടെന്നും ഒരു വിഭാഗം വാദിക്കുന്നു.
-
വിമർശിക്കുന്നവരുടെ വാദം: ഒരാളുടെ വസ്ത്രധാരണ സ്വാതന്ത്ര്യത്തിൽ ഇടപെടാൻ ആർക്കും അവകാശമില്ലെന്നും, വ്യക്തിപരമായ വസ്ത്രധാരണ രീതികളെ ഇത്തരത്തിൽ പരസ്യമായി അധിക്ഷേപിക്കുന്നത് ശരിയല്ലെന്നും വ്യക്തമാക്കി തെസ്നിയെ വിമർശിക്കുന്നവരും നിരവധിയാണ്.
അതേസമയം, വസ്ത്രധാരണത്തെക്കുറിച്ചുള്ള തർക്കങ്ങൾക്കൊപ്പം തന്നെ മഴക്കെടുതിക്കിടയിലെ മുഖ്യമന്ത്രിയുടെ ചടങ്ങ് പങ്കാളിത്തത്തെക്കുറിച്ചുള്ള രാഷ്ട്രീയ വിമർശനങ്ങളും സോഷ്യൽ മീഡിയയിൽ സജീവമായി തുടരുകയാണ്.
