ട്രെയിനിൽ എസി പ്രവർത്തിച്ചില്ലേ? ടിക്കറ്റ് തുക തിരികെ ലഭിക്കും; അറിയേണ്ട കാര്യങ്ങൾ ഇവയാണ്

ന്യൂഡൽഹി: ട്രെയിൻ യാത്രയ്ക്കിടെ നിങ്ങൾ സഞ്ചരിച്ച എസി കോച്ചിലെ എയർ കണ്ടീഷണർ പ്രവർത്തിച്ചില്ലെങ്കിൽ ടിക്കറ്റ് നിരക്കിന്റെ ഒരു ഭാഗം റീഫണ്ടായി ലഭിക്കും. എസി ക്ലാസ് നിരക്കും നോൺ എസി ക്ലാസ് നിരക്കും തമ്മിലുള്ള വ്യത്യാസമാണ് യാത്രക്കാരന് തിരികെ ലഭിക്കുക.

എന്നാൽ ഈ തുക തിരികെ ലഭിക്കുന്നതിന് ചില വ്യക്തമായ നിയമങ്ങളും നടപടിക്രമങ്ങളും പാലിക്കേണ്ടതുണ്ട്:

• ടിടിഇ സർട്ടിഫിക്കറ്റ് അനിവാര്യം: എസി പ്രവർത്തിച്ചില്ലെന്ന കാര്യം ട്രെയിനിലെ ടിടിഇയെ (TTE) അറിയിച്ച് അതിനുള്ള സർട്ടിഫിക്കറ്റ് കൈപ്പറ്റണം.

• സമയപരിധി: ഗമ്യസ്ഥാനത്ത് എത്തിയതിന് ശേഷം 20 മണിക്കൂറിനുള്ളിൽ ഐആർസിടിസി (IRCTC) വഴി ടിഡിആർ (TDR – Ticket Deposit Receipt) ഫയൽ ചെയ്താൽ മാത്രമേ റീഫണ്ട് ലഭിക്കൂ.

എന്താണ് ടിഡിആർ (TDR)?

ട്രെയിൻ വൈകുക, വെയിറ്റിംഗ് ലിസ്റ്റിലുള്ള യാത്ര കൺഫോം ആകാതിരിക്കുക, അല്ലെങ്കിൽ എസി പ്രവർത്തിക്കാതിരിക്കുക തുടങ്ങിയ സാഹചര്യങ്ങളിൽ ടിക്കറ്റ് തുക തിരികെ ലഭിക്കുന്നതിനായി ഐആർസിടിസി പോർട്ടൽ വഴി സമർപ്പിക്കുന്ന അപേക്ഷയാണ് ടിഡിആർ.

മറ്റ് സാഹചര്യങ്ങളും ടിഡിആർ സമയപരിധിയും:

• കോച്ച് മാറ്റങ്ങൾ: ബുക്ക് ചെയ്തതിന് പകരം താഴ്ന്ന ക്ലാസിലെ കോച്ച് അനുവദിക്കുകയോ, സീറ്റില്ലാത്തതിനാൽ കോച്ച് മാറ്റി നൽകുകയോ ചെയ്താൽ ടിടിഇയിൽ നിന്നുള്ള സർട്ടിഫിക്കറ്റ് വാങ്ങി 2 ദിവസത്തിനകം ടിഡിആർ സമർപ്പിക്കണം.

• വഴിതിരിച്ചുവിടൽ/അധിക ചാർജ്: ട്രെയിൻ വഴിതിരിച്ചുവിട്ടത് മൂലം യാത്ര അവസാനിപ്പിക്കേണ്ടി വരിക, ലക്ഷ്യസ്ഥാനത്ത് എത്താൻ വൈകുക, അല്ലെങ്കിൽ കൂടുതൽ ചാർജ് ഈടാക്കുക എന്നീ സാഹചര്യങ്ങളിൽ 72 മണിക്കൂറിനുള്ളിൽ അപേക്ഷിക്കണം.

• ട്രെയിൻ റദ്ദാക്കൽ/വൈകൽ: ട്രെയിൻ പൂർണ്ണമായി റദ്ദാക്കുകയോ 3 മണിക്കൂറിൽ കൂടുതൽ വൈകുകയോ ചെയ്താലും പൂർണ്ണ റീഫണ്ടിന് അർഹതയുണ്ട്.

അപേക്ഷിക്കേണ്ട വിധം:

ഐആർസിടിസിയുടെ ഔദ്യോഗിക വെബ്‌സൈറ്റിലോ ആപ്പിലോ ലോഗിൻ ചെയ്ത്, ടിക്കറ്റ് ബുക്ക് ചെയ്ത അക്കൗണ്ടിൽ നിന്ന് ‘File TDR’ എന്ന ഓപ്ഷൻ തിരഞ്ഞെടുത്ത് അനായാസം റീഫണ്ടിനായി അപേക്ഷിക്കാവുന്നതാണ്.