ഇന്ത്യൻ സിനിമയിലെ തന്നെ ഏറ്റവും മികച്ചതും നിലവാരമുള്ളതുമായ സൃഷ്ടികൾ പുറത്തിറങ്ങുന്ന മലയാളത്തിൽ എന്തുകൊണ്ട് നല്ല കുട്ടികളുടെ സിനിമകൾ ജനിക്കുന്നില്ല എന്ന ചോദ്യം നമ്മളിൽ എത്രപേർ സ്വയം ചോദിച്ചിട്ടുണ്ട്? ഉത്തരങ്ങൾ അന്വേഷിച്ചു പോയാൽ ചെന്നെത്തുന്നത് കടുപ്പമേറിയ ഒരു യാഥാർത്ഥ്യത്തിലാണ്—സ്റ്റാർ വാല്യൂവും വലിയ പേരുകളുടെ പകിട്ടുമില്ലാത്ത ഒരു കൊച്ചു ചിത്രത്തിനും ഇവിടെ തിയറ്ററിലോ ടിവിയിലോ ഒടിടിയിലോ ഒരു ബിസിനസ്സ് സാധ്യതയുമില്ല!
കഴിഞ്ഞ സംസ്ഥാന ചലച്ചിത്ര അവാർഡ് പ്രഖ്യാപന വേളയിൽ ജൂറി ചെയർമാൻ ഉന്നയിച്ച നിരീക്ഷണം ഇതിനോട് ചേർത്തു വായിക്കേണ്ടതാണ്. മത്സരത്തിനെത്തിയ ചിത്രങ്ങളിൽ “മികച്ച കുട്ടികളുടെ സിനിമ” എന്ന കാറ്റഗറിയിൽ അവാർഡിന് അർഹമായ സിനിമകൾ ഒന്നുമുണ്ടായിരുന്നില്ല എന്നതായിരുന്നു ആ കടുത്ത സത്യം. മലയാളത്തിൽ കുട്ടികളുടെ സിനിമകൾ കൂടുതൽ ഉണ്ടാകണമെന്നും അതിനായി സർക്കാരിന്റെ ഭാഗത്തുനിന്നും ആവശ്യമായ നടപടികൾ ഉണ്ടാകണമെന്നും അദ്ദേഹം അടിവരയിട്ടു പറയുകയുണ്ടായി.
എന്നാൽ ഈ കറുത്ത ക്യാൻവാസിനിടയിലും ഒരു കൊച്ചു വെളിച്ചമായി അവാർഡ് മത്സരത്തിനെത്തിയ ചിത്രമായിരുന്നു ‘സ്കൂൾ ചലേ ഹം’. ശ്രീകാന്ത് ഇ.ജി, ആദിത്ത് യു.എസ്, ബിനോജ് കെ.വി എന്നിവർ ചേർന്ന് രചിച്ച് ശ്രീകാന്ത് ഇ.ജി സംവിധാനം ചെയ്ത ഈ ചിത്രം കുട്ടികളുടെ സിനിമ എങ്ങനെയായിരിക്കണം എന്നതിന്റെ മികച്ച ഉദാഹരണമാണ്. കണ്ണൂരിന്റെ പശ്ചാത്തലത്തിൽ, നാടോടിക്കഥകളെയും മിത്തുകളെയും ചേർത്തുവെച്ച് ഒരു ചെറിയ യു.പി സ്കൂളിലെ കുട്ടികളുടെ സാധാരണ ജീവിതവും അവിടുത്തെ അസാധാരണ സംഭവവികാസങ്ങളുമാണ് ചിത്രം പറയുന്നത്.
ഒരു മുത്തശ്ശിക്കഥ കേൾക്കുന്ന സുഖത്തോടെ കണ്ടിരിക്കാവുന്ന ഈ സിനിമയിൽ മുഖപരിചയമുള്ള ഒരാൾ പോലും അഭിനേതാവായി എത്തിയിട്ടില്ല. മുതിർന്നവരുടെ കഥയിൽ കുട്ടിക്കാലത്തെ നൊസ്റ്റാൾജിയ കൂട്ടിച്ചേർത്ത് വിൽക്കുന്ന പതിവ് വിദ്യയല്ല ഇവിടെയുള്ളത്. ആദ്യപകുതിക്ക് ശേഷം നൂറുശതമാനവും “കുട്ടികളുടെ” മാത്രം സിനിമയായി മാറുന്ന ഈ ചിത്രത്തിലെ കാസ്റ്റിംഗിലെ പുതുമ കാണുന്ന പ്രേക്ഷകരിലും വലിയ അനുഭവേദ്യമാകുന്നുണ്ട്.
അവാർഡുകൾ എന്നത് കണ്ണഞ്ചിപ്പിക്കുന്ന താരനിശകൾ നടത്തുവാനുള്ള തെരഞ്ഞെടുപ്പ് മാത്രമായി ഒതുങ്ങിപ്പോകുന്ന ഇക്കാലത്ത് ഇതുപോലെയുള്ള സിനിമകൾ അവാർഡ് ലിസ്റ്റിൽ നിന്ന് പുറത്താവുന്നതിൽ അത്ഭുതമില്ല. എങ്കിലും ഒരു പിടി നല്ല അഭിനയ മുഹൂർത്തങ്ങളും മികച്ച ദൃശ്യമികവും പശ്ചാത്തല സംഗീതവും ഗാനവുമൊക്കെ അടങ്ങിയ ഈ നല്ല ചിത്രം കൂടുതൽ പ്രേക്ഷകരെ അർഹിക്കുന്നുണ്ട്. പ്രേക്ഷകർ മനസ്സുവെച്ചാൽ മാത്രമേ ‘സ്കൂൾ ചലേ ഹം’ പോലുള്ള മികച്ച പരിശ്രമങ്ങൾ കൂടുതൽ ആളുകളിലേക്ക് എത്തുകയും, മലയാളത്തിൽ കുട്ടികൾക്കായി ഇനിയും പുതിയ സിനിമകൾ പിറവിയെടുക്കുകയും ചെയ്യൂ.
