സോഷ്യൽ മീഡിയയിൽ നിരന്തരം നേരിടേണ്ടി വരുന്ന ഹേറ്റ് കമന്റുകളോടും വിമർശനങ്ങളോടും ശക്തമായി പ്രതികരിച്ച് ഇൻഫ്ലുവൻസറും വ്ലോഗറുമായ ദിയ കൃഷ്ണ. ക്യാമറയ്ക്ക് മുന്നിൽ അഭിനയിക്കാൻ തനിക്ക് താല്പര്യമില്ലെന്നും താൻ യഥാർത്ഥ ജീവിതത്തിൽ എങ്ങനെയാണോ അങ്ങനെ തന്നെയാണ് വീഡിയോകളിലും പ്രത്യക്ഷപ്പെടുന്നതെന്നും ദിയ വ്യക്തമാക്കി.
താൻ ഒരു ഹോബി എന്ന നിലയ്ക്കാണ് വ്ലോഗിംഗ് ചെയ്യുന്നത്. തന്നെ കാണാൻ ഇഷ്ടപ്പെടുന്നവർക്കായി സമയം കണ്ടെത്തി വീഡിയോകൾ പങ്കുവെക്കുക മാത്രമാണ് ചെയ്യുന്നത്. അല്ലാതെ ആരെയും വെറുപ്പിക്കാനല്ല വീഡിയോകൾ ഇടുന്നത്.
“ഭൂമിയിലുള്ള എല്ലാവരെയും ഇഷ്ടപ്പെടാൻ ആർക്കും സാധിക്കില്ല. എനിക്കും ഇഷ്ടമില്ലാത്തവരും എന്നെ ദ്രോഹിച്ചവരുമുണ്ട്. എന്ന് കരുതി അവരുടെ വീടിന് മുന്നിൽ പോയി കല്ലെറിയേണ്ട കാര്യമില്ല. പോയി കല്ലെറിയുന്ന നമ്മളാണ് പൊട്ടന്മാർ. ഇഷ്ടമില്ലാത്തവരെ മൈൻഡ് ചെയ്യാതിരിക്കുകയോ ബ്ലോക്ക് ചെയ്യുകയോ ആണ് വേണ്ടത്,” ദിയ കൂട്ടിച്ചേർത്തു.
സോഷ്യൽ മീഡിയയിൽ കാണിക്കുന്ന കാര്യങ്ങൾ മാത്രമാണ് ആളുകൾ കാണുന്നത്. അത് ഫേക്ക് ആകാനും അല്ലാതിരിക്കാനും സാധ്യതയുണ്ട്. ആളുകൾക്ക് കൈയടിക്കാൻ തോന്നുമ്പോലെ പെരുമാറാൻ ആർക്കും സാധിക്കും, അതാണ് സോഷ്യൽ മീഡിയ എന്ന മായാലോകം.
യഥാർത്ഥ ജീവിതത്തിൽ വേറെ പെരുമാറ്റവും ക്യാമറയ്ക്ക് മുന്നിൽ മറ്റൊരു പെരുമാറ്റവുമുള്ള പലരെയും തനിക്ക് വ്യക്തിപരമായി അറിയാം. അതിനാൽ യൂട്യൂബേഴ്സിനെ കണ്ട് ‘അവരെപ്പോലെയാകൂ’ എന്ന് പറഞ്ഞ് തന്നെ ആരോടും താരതമ്യം ചെയ്യരുതെന്നും ദിയ അഭ്യർത്ഥിച്ചു.
തന്റെ ജീവിതത്തിൽ യാതൊരു വ്യാജത്വവുമില്ലെന്ന് ദിയ വ്യക്തമാക്കുന്നു. “എന്നെ നേരിട്ട് കണ്ട ഒരാളും ഞാൻ അഹങ്കാരിയാണെന്ന് പറഞ്ഞിട്ടില്ല. ഞാൻ വളരെ ഡൗൺ ടു എർത്താണ്. എന്നെക്കൊണ്ട് സഹായിക്കാൻ പറ്റുന്നവരെയെല്ലാം ഞാൻ സഹായിക്കാറുണ്ട്. എന്നെ പറ്റിക്കാൻ പറ്റുന്നവർ പറ്റിച്ച് പോയിട്ടുമുണ്ട്. ഇതൊക്കെ എന്നെ ഒരിക്കലെങ്കിലും പരിചയപ്പെട്ടവർക്ക് നന്നായി അറിയാം.”
അതുപോലെ അശ്വിന്റെയും തന്റെയും കുടുംബങ്ങൾ വളരെ സന്തോഷത്തോടെയാണ് കഴിയുന്നത്. അങ്ങോട്ടും ഇങ്ങോട്ടും യാതൊരു പ്രശ്നങ്ങളുമില്ല. ആളുകൾ കമന്റ് ബോക്സിൽ പറയുന്നത് പോലെ ജീവിക്കാൻ ആർക്കും കഴിയില്ല. ഒരു യഥാർത്ഥ വ്യക്തിയെയാണ് ഇഷ്ടപ്പെടുന്നതെങ്കിൽ മാത്രം തന്റെ വീഡിയോകൾ കണ്ടാൽ മതിയെന്നും ദിയ കൃഷ്ണ തുറന്നടിച്ചു.
