സോഷ്യൽ മീഡിയ ക്രിയേറ്ററും ഇൻഫ്ലുവൻസറും നടനുമായ അഖിൽ NRD-യുടെ കുടുംബജീവിതത്തിലുണ്ടായ സംഭവങ്ങളും തുടർന്നുണ്ടായ സൈബർ ആക്രമണങ്ങളുമാണ് ഇപ്പോൾ സോഷ്യൽ മീഡിയയിൽ പ്രധാന ചർച്ചാവിഷയം. അഖിലിന്റെ ഭാര്യ മേഘ മറ്റൊരാൾക്കൊപ്പം പോയ വാർത്ത പുറത്തുവന്നതിന് പിന്നാലെ ഇരുവർക്കുമെതിരെ രൂക്ഷമായ അധിക്ഷേപങ്ങളും പരിഹാസങ്ങളുമാണ് സോഷ്യൽ മീഡിയയിൽ ഉയരുന്നത്.
എന്നാൽ, വസ്തുതകൾ പൂർണ്ണമായി അറിയാതെ വ്യക്തിപരമായ വിഷയങ്ങളിൽ കയറി ഇരുവരെയും കുറ്റപ്പെടുത്തുന്ന സോഷ്യൽ മീഡിയയുടെ ട്രോൾ സംസ്കാരത്തിനെതിരെ ഫേസ്ബുക്കിൽ അനു ചന്ദ്ര എഴുതിയ കുറിപ്പ് ഏവരുടെയും ശ്രദ്ധ നേടുകയാണ്.
“അവളെയും അവനെയും വിധിക്കേണ്ടതില്ല; അതാണ് മര്യാദ”
ഒരു ദാമ്പത്യത്തിനുള്ളിൽ നിൽക്കുന്നവർ അനുഭവിക്കുന്ന ഭയം, മാനസിക സമ്മർദ്ദം, വ്യക്തിപരമായ അവസ്ഥകൾ എന്നിവ പുറത്തുനിന്ന് നോക്കുന്നവർക്ക് മനസ്സിലാകില്ലെന്ന് അനു ചന്ദ്ര തന്റെ കുറിപ്പിൽ വ്യക്തമാക്കുന്നു.
കുറിപ്പിൽ നിന്ന്:
“ഒരു ഇൻഫ്ലുവൻസറുടെ ഭാര്യ ഒളിച്ചോടി പോയ വാർത്ത കണ്ടു. പൊയ്ക്കോട്ടേ എന്നെ ഞാൻ പറയൂ. കാരണം അവൾ അവളുടെ വിവാഹ ജീവിതത്തിൽ ഹാപ്പി അല്ല. അതുകൊണ്ടാണല്ലോ വേറൊരുത്തന്റെ കൂടെ പോയത്.
പുറത്ത് നിന്ന് നോക്കുമ്പോൾ ഒരു ബന്ധം അവസാനിപ്പിക്കാനുള്ള മാന്യമായ വഴി കാര്യങ്ങൾ തുറന്ന് പറഞ്ഞ് വേർപിരിയുന്നതാണെന്ന് നമുക്ക് തോന്നാം. എന്നാൽ ആ ബന്ധത്തിനുള്ളിൽ നിൽക്കുന്ന ഒരാളെ സംബന്ധിച്ചിടത്തോളം അവരുടെ ഭയവും മാനസികാവസ്ഥയും അവർക്ക് മാത്രമേ അറിയൂ.
ജീവിതം എല്ലായ്പ്പോഴും ആദർശപരമായി നടക്കുന്ന ഒന്നല്ല. അതുകൊണ്ട് ദാമ്പത്യത്തിൽ സന്തോഷമില്ലായിരുന്നെങ്കിൽ അവൾക്ക് മറ്റൊരു വഴി തിരഞ്ഞെടുക്കാം. എന്നാൽ എന്തുകൊണ്ടാണ് അവൾക്ക് അങ്ങനെ പോകേണ്ടിവന്നത് എന്നറിയാതെ അവളെയും, എന്താണ് അവന് സംഭവിച്ചതെന്ന് അറിയാതെ അവനെയും വിധിക്കേണ്ടതില്ല. അതാണ് മര്യാദ.”
അനു ചന്ദ്രയുടെ ഈ നിലപാടിനെ പിന്തുണച്ച് നിരവധിയാളുകളാണ് പോസ്റ്റിന് താഴെ കമന്റുകളുമായെത്തുന്നത്. ‘അവരായി അവരുടെ ജീവിതമായി, പുറത്തുനിൽക്കുന്നവർ ആളുകളെ വിചാരണ ചെയ്യുന്നത് അവസാനിപ്പിക്കണം’ എന്നാണ് ഭൂരിഭാഗം പേരുടെയും അഭിപ്രായം.
റീൽസുകളിലൂടെ പ്രിയങ്കരി; ഒടുവിൽ വഴിപിരിയൽ
വിവാഹം കഴിഞ്ഞ് രണ്ട് വർഷം തികയുന്നതിനിടെയാണ് മേഘ വീടുവിട്ടിറങ്ങിയത്. അഖിലിന്റെ റീലുകളിലൂടെ സോഷ്യൽ മീഡിയ പ്ലാറ്റ്ഫോമുകളിൽ മേഘയും ഫോളോവേഴ്സിന് ഏറെ സുപരിചിതയായിരുന്നു.
അടുത്തിടെ അഖിൽ പ്രധാന വേഷത്തിലെത്തിയ ‘മഹാരാജ ഹോസ്റ്റൽ’ എന്ന സിനിമയുടെ റിലീസ് ദിനത്തിൽ തിയേറ്ററിലെത്തി അഖിലിനെ പ്രശംസിച്ച മേഘയുടെ വീഡിയോകളും വൈറലായിരുന്നു. ഇതിനിടയിലാണ് തികച്ചും അപ്രതീക്ഷിതമായി ഈ സംഭവവികാസങ്ങൾ ഉണ്ടാകുന്നത്.
