മണിക്കൂറുകളോളം കഴുത്ത് കുനിച്ചുപിടിച്ച് മൊബൈൽ ഫോണും ടാബ്ലെറ്റും ഉപയോഗിച്ചതിനെ തുടർന്ന് മൂന്ന് ലക്ഷം രൂപ ചെലവാക്കി കഴുത്തിന് ശസ്ത്രക്രിയ ചെയ്യേണ്ടി വന്ന അനുഭവം പങ്കുവെച്ച് നടി ഷക്കീല. അമിതമായ ഗാഡ്ജറ്റ് ഉപയോഗവും തെറ്റായ ഇരിപ്പുരീതിയും ഉണ്ടാക്കുന്ന ആരോഗ്യപ്രശ്നങ്ങളെക്കുറിച്ച് സ്വന്തം യൂട്യൂബ് ചാനലിലൂടെയാണ് നടി മുന്നറിയിപ്പ് നൽകിയത്.
ദിവസവും 5 മുതൽ 6 മണിക്കൂർ വരെ കിടക്കയിൽ ഒരു വശത്തേക്ക് ചരിഞ്ഞുകിടന്ന് കഴുത്ത് കുനിച്ച് ഗെയിം കളിച്ചതാണ് സ്ഥിതി ഗുരുതരമാക്കിയത്. കഴിഞ്ഞ ഡിസംബറിൽ ഇടത് തോളിൽ ആരംഭിച്ച വേദന ഫിസിയോതെറാപ്പി ചെയ്തിട്ടും മാറാതെ വന്നതോടെയാണ് എംആർഐ സ്കാനിംഗിന് വിധേയയായത്. തുടർന്ന് അടിയന്തിര ശസ്ത്രക്രിയക്ക് വിധേയയാവുകയും കഴുത്തിന് പിന്നിൽ ടൈറ്റാനിയം പ്ലേറ്റ് വച്ച് സ്ക്രൂ ചെയ്യുകയുമായിരുന്നു.
ദീർഘനേരം കഴുത്ത് കുനിച്ചോ ഒരു വശത്തേക്ക് ചരിഞ്ഞോ ഫോൺ ഉപയോഗിക്കുമ്പോൾ നട്ടെല്ലിലും പേശികളിലും ഉണ്ടാകുന്ന കടുത്ത സമ്മർദ്ദമാണ് ഇതിന് കാരണം. ‘ടെക് നെക്ക്’ (Tech Neck) എന്നാണ് ഡോക്ടർമാർ ഈ അവസ്ഥയെ വിളിക്കുന്നത്.
ശ്രദ്ധിക്കേണ്ട പ്രധാന കാര്യങ്ങൾ:
-
ഫോൺ എപ്പോഴും കണ്ണിന് നേരെ ഉയർത്തിപ്പിടിച്ച് മാത്രം ഉപയോഗിക്കുക.
-
ഒരു വശം ചരിഞ്ഞുകിടന്ന് കഴുത്ത് വെട്ടിച്ച് ഫോൺ നോക്കുന്നത് പൂർണ്ണമായും ഒഴിവാക്കുക.
-
തുടർച്ചയായ ഉപയോഗം ഒഴിവാക്കി ഇടയ്ക്കിടെ ഇടവേളകൾ എടുക്കുക.
-
കഴുത്തുവേദന തോളുകളിലേക്കോ കൈകളിലേക്കോ പടരുകയോ മരവിപ്പ് അനുഭവപ്പെടുകയോ ചെയ്താൽ ഉടൻ വൈദ്യസഹായം തേടുക.
Shakeela Neck Surgery Tech Neck Prevention Mobile Phone Health Hazards Shakeela Health Update Mobile Usage Warning Health News Malayalam Kerala News Malayalam
