ബിഗ് ബജറ്റ് കോമഡി ആക്ഷൻ ത്രില്ലർ ചിത്രത്തിനായി നടൻ മോഹൻലാലും സംവിധായകൻ അനൂപ് സത്യനും കൈകോർക്കുന്നു. ദുൽഖർ സൽമാൻ കേന്ദ്ര കഥാപാത്രമായെത്തിയ ‘വരനെ ആവശ്യമുണ്ട്’ എന്ന സൂപ്പർഹിറ്റ് ചിത്രത്തിന് ശേഷം അനൂപ് സത്യൻ സംവിധാനം ചെയ്യുന്ന രണ്ടാമത്തെ ചിത്രമാണിത്. അനൂപ് സത്യൻ തന്നെയാണ് ചിത്രത്തിന്റെ കഥയും തിരക്കഥയും നിർവഹിക്കുന്നത്.
ആശിർവാദ് സിനിമാസും ‘ബൾട്ടി’ സിനിമയുടെ നിർമാതാവായ ബിനു ജോർജ് അലക്സാണ്ടറും ചേർന്നാണ് ചിത്രം നിർമിക്കുന്നത്. ‘ഭ്രമയുഗം’, ‘ഉള്ളൊഴുക്ക്’ തുടങ്ങിയ ചിത്രങ്ങളുടെ ചായാഗ്രഹണം നിർവഹിച്ച ഷഹ്നാദ് ജലാൽ ക്യാമറയും, ജേക്സ് ബിജോയ് സംഗീത സംവിധാനവും നിർവഹിക്കും. സംവിധായകൻ അനൂപ് സത്യൻ തന്നെയാണ് ചിത്രത്തിന്റെ എഡിറ്റിംഗും കൈകാര്യം ചെയ്യുന്നത്.
സിങ്ക് സൗണ്ടിലാണ് (Sync Sound) ചിത്രം ഒരുക്കുന്നത് എന്ന പ്രത്യേകതയുമുണ്ട്. മോഹൻലാൽ സിങ്ക് സൗണ്ടിൽ അഭിനയിക്കുന്ന മൂന്നാമത്തെ ചിത്രമാകും ഇതെന്ന് അനൂപ് സത്യൻ വ്യക്തമാക്കി. ലൊക്കേഷൻ സൗണ്ടും സൗണ്ട് ഡിസൈനും അനിൽ രാധാകൃഷ്ണനാണ് നിർവഹിക്കുന്നത്. ‘ആടുജീവിതം’ ഫെയിം പ്രശാന്ത് മാധവ് കലാസംവിധാനവും സുജിത് കോസ്റ്റ്യൂം ഡിസൈനും നിർവഹിക്കുന്ന ചിത്രത്തിന്റെ ചിത്രീകരണം നവംബറിൽ ആരംഭിക്കും.
#Mohanlal #AnoopSathyan #AashirvadCinemas #JakesBejoy #MalayalamCinema #CinemaNews #EntertainmentNews #MohanlalMovies
