സാങ്കേതിക ലോകം ആകാംക്ഷയോടെ കാത്തിരിക്കുന്ന ആപ്പിളിന്റെ നിർണായക ഉൽപ്പന്ന വിപണിയിറക്കൽ ചടങ്ങ് (Launch Event) സെപ്റ്റംബർ 9-ന് നടക്കും. “സർപ്രൈസ് ആൻഡ് ഷൈൻ” (Surprise and Shine) എന്ന ടാഗ്ലൈനോടെയെത്തുന്ന ഈ ചടങ്ങിൽ പുതിയ ഐഫോൺ മോഡലുകൾ, സ്മാർട്ട് വാച്ച്, എയർപോഡുകൾ എന്നിവ കമ്പനി അവതരിപ്പിക്കുമെന്നാണ് റിപ്പോർട്ടുകൾ.
സെപ്റ്റംബർ 9-ന് രാവിലെ 10 മണിക്ക് (ഇന്ത്യൻ സമയം രാത്രി 10:30) കുപ്പർട്ടിനോയിലെ ആപ്പിൾ പാർക്കിലുള്ള സ്റ്റീവ് ജോബ്സ് തിയേറ്ററിലാണ് ഇവന്റ് നടക്കുക. ആപ്പിളിന്റെ ഔദ്യോഗിക യൂട്യൂബ് ചാനൽ, ആപ്പിൾ ടിവി ആപ്പ്, കമ്പനിയുടെ വെബ്സൈറ്റ് എന്നിവ വഴി തത്സമയം ചടങ്ങ് വീക്ഷിക്കാനാകും.
മടക്കാവുന്ന ഐഫോൺ ഫോൾഡബിളിലേക്ക്?
ആപ്പിളിന്റെ ചരിത്രത്തിലെ ആദ്യത്തെ മടക്കാവുന്ന ഫോണായ ‘ഐഫോൺ അൾട്രാ’ ഈ ഇവന്റിൽ അവതരിപ്പിച്ചേക്കുമെന്നാണ് പ്രധാന സൂചന. സാംസങ് ഗാലക്സി ഇസഡ് ഫോൾഡിന് സമാനമായ ഡിസൈനിലാകും ഇതെത്തുക. ഇതോടൊപ്പം ഐഫോൺ 18 പ്രോ സീരീസും (iPhone 18 Pro) ചടങ്ങിൽ എത്തും. A20 പ്രോ ചിപ്സെറ്റായിരിക്കും ഫോണുകൾക്ക് കരുത്തേകുക. പ്രോ മാക്സ് മോഡലിൽ മെക്കാനിക്കൽ അപർച്ചർ ക്യാമറ ഫീച്ചറും പുതിയ സ്കൈ ബ്ലൂ കളർ ഓപ്ഷനും ഉണ്ടായേക്കും. അതേസമയം, 18-ന്റെ ബേസ് മോഡൽ അടുത്ത വർഷം ആദ്യത്തോടെയാകും വിപണിയിലെത്തുക.
പുതിയ പ്രോസസറും ഹെൽത്ത് ട്രാക്കിങ് ഫീച്ചറുകളുമായി ആപ്പിൾ വാച്ച് സീരീസ് 12, ആപ്പിൾ വാച്ച് അൾട്രാ 4, പുതിയ എയർപോഡ്സ് 5 എന്നിവയും ഇവന്റിൽ പ്രധാന ആകർഷണങ്ങളാകും.
പുതിയ സിഇഒയുടെ കീഴിലെ ആദ്യ ഇവന്റ്
ഇത്തവണത്തെ ലോഞ്ച് ഇവന്റിന് മറ്റൊരു പ്രത്യേകത കൂടിയുണ്ട്. പുതിയ സിഇഒ ജോൺ ടെർനസ് ചുമതലയേറ്റ ശേഷമുള്ള ആദ്യ പ്രധാന ഇവന്റാണിത്. നിലവിലെ സിഇഒ ടിം കുക്ക് സ്ഥാനമൊഴിയുന്ന പശ്ചാത്തലത്തിൽ, ഹാർഡ്വെയർ എൻജിനീയറിങ് വിഭാഗത്തിലെ സീനിയർ വൈസ് പ്രസിഡന്റായിരുന്ന ജോൺ ടെർനസാണ് പുതിയ സിഇഒയായി ആപ്പിളിനെ നയിക്കുന്നത്.
