ചിങ്ങം പിറന്നു; പൂവിളികളോടെ ഓണവിപണി സജീവം, ഗുണ്ടൽപേട്ടിൽ മഴക്കമ്മി: തിരിച്ചടിയായി വിലക്കയറ്റം

കോഴിക്കോട്: ചിങ്ങം ഒന്നായതോടെ നാടെങ്ങും ഓണാഘോഷങ്ങൾക്ക് തുടക്കമായി. ഗ്രാമങ്ങളിലും നഗരങ്ങളിലും പൂക്കളങ്ങൾ വിരിഞ്ഞുതുടങ്ങിയതോടെ പൂവിപണിയും സജീവമായി. എന്നാൽ ഇത്തവണ മഴ കുറഞ്ഞത് പൂക്കളുടെ ലഭ്യതയെ ബാധിച്ചതോടെ വിപണിയിൽ വിലയേറിയ നിരക്കാണ് രേഖപ്പെടുത്തുന്നത്.

പ്രധാന പൂ ഉത്പാദന കേന്ദ്രമായ ഗുണ്ടൽപേട്ടിൽ മഴ ലഭിക്കാത്തതിനെ തുടർന്ന് കൃഷി കുറഞ്ഞതാണ് തിരിച്ചടിയായത്. അരളിയാണ് ഇത്തവണ വിപണിയിലെ താരം; കിലോയ്ക്ക് ശരാശരി 600 രൂപ വരെയാണ് അരളിയുടെ വില. ജമന്തിക്ക് 200 മുതൽ 400 രൂപ വരെയും പനിനീർപൂക്കൾക്ക് 200 മുതൽ 400 രൂപ വരെയുമാണ് നിരക്ക്. മഞ്ഞ, ഓറഞ്ച് ചെണ്ടുമല്ലികൾക്ക് 80 മുതൽ 160 രൂപ വരെയും വാടാമല്ലിക്ക് 160 രൂപ വരെയുമാണ് നിലവിലെ ശരാശരി വില.

നിലവിൽ ബെംഗളൂരുവിന് സമീപമുള്ള ചിക്ക്ബെല്ലപൂരിൽ നിന്നാണ് പ്രധാനമായും കോഴിക്കോട്ടേക്ക് പൂക്കളെത്തുന്നത്. അന്യസംസ്ഥാന പൂക്കൾക്കൊപ്പം നാടൻ പൂക്കളും ഇത്തവണ വിപണിയിലുണ്ട്. കുടുംബശ്രീയുടെ നേതൃത്വത്തിൽ ജില്ലയിലെ 322 വാർഡുകളിലായി 9.35 ഏക്കറിലാണ് പൂക്കൃഷി നടത്തിയിട്ടുള്ളത്. ഇതുകൂടാതെ, 500 മുതൽ 1500 രൂപ വരെയുള്ള റെഡിമെയ്ഡ് പൂക്കളങ്ങളും വിപണിയിൽ ലഭ്യമാണ്.