മലയാള സിനിമയിലെ യുവതാരനിര ഒന്നിക്കുന്ന ആക്ഷൻ-കോമഡി ത്രില്ലർ ചിത്രം ‘അതിരടി’യുടെ ട്രെയിലർ പുറത്തിറങ്ങി. നവാഗതനായ അരുൺ അനിരുദ്ധൻ സംവിധാനം ചെയ്യുന്ന ചിത്രം ക്യാമ്പസ് പശ്ചാത്തലത്തിലുള്ള ഒരു സമ്പൂർണ്ണ എന്റർടൈനറായിരിക്കുമെന്ന സൂചനയാണ് ട്രെയിലർ നൽകുന്നത്. ടൊവിനോയും ബേസിലും തമ്മിലുള്ള സംഘട്ടന രംഗങ്ങളടക്കം ഉൾപ്പെടുത്തിയ ട്രെയിലർ ഇതിനോടകം തന്നെ ആരാധകർക്കിടയിൽ വലിയ ചർച്ചയായിട്ടുണ്ട്.
ചിത്രത്തിൽ ‘സാം ബോയ്’ എന്ന് വിളിപ്പേരുള്ള സ്റ്റൈലിഷ് കോളേജ് വിദ്യാർത്ഥിയായാണ് ബേസിൽ ജോസഫ് വേഷമിടുന്നത്. ‘ശ്രീക്കുട്ടൻ വെള്ളായണി’ എന്ന ഗായകനായി ടൊവിനോ തോമസ് മാസ് ലുക്കിൽ എത്തുമ്പോൾ, വിനീത് ശ്രീനിവാസൻ വിനീത് ആയിത്തന്നെ ചിത്രത്തിൽ പ്രത്യക്ഷപ്പെടുന്നു. റിയ ഷിബു (സ്വാതി ആർ കൃഷ്ണ), സരിൻ ഷിഹാബ് എന്നിവരാണ് ചിത്രത്തിലെ പ്രധാന സ്ത്രീ കഥാപാത്രങ്ങളെ അവതരിപ്പിക്കുന്നത്. സംഗീത സംവിധായകൻ ഷാൻ റഹ്മാനും ചിത്രത്തിൽ ഒരു പ്രധാന വേഷം കൈകാര്യം ചെയ്യുന്നുണ്ട്.
അനന്തു എന്റർടൈൻമെന്റിന്റെ ബാനറിൽ ഡോ. അനന്തു എസും ബേസിൽ ജോസഫ് എന്റർടൈൻമെന്റിന്റെ ബാനറിൽ ബേസിൽ ജോസഫും ചേർന്നാണ് ചിത്രം നിർമ്മിക്കുന്നത്. പ്രശസ്ത സംവിധായകനും ഛായാഗ്രാഹകനുമായ സമീർ താഹിറും ടൊവിനോ തോമസും ചിത്രത്തിന്റെ കോ-പ്രൊഡ്യൂസർമാരായി പ്രവർത്തിക്കുന്നു. മിന്നൽ മുരളിക്ക് ശേഷം ടൊവിനോയും ബേസിലും വീണ്ടും ഒന്നിക്കുന്ന ഈ ചിത്രം മെയ് 14-ന് തിയേറ്ററുകളിൽ പ്രദർശനത്തിനെത്തും.
