ന്യൂഡൽഹി: 2025-26 സാമ്പത്തിക വർഷത്തെ ആദായനികുതി റിട്ടേൺ (ITR) ഫയൽ ചെയ്യുന്നതിനുള്ള നടപടികൾ രാജ്യത്ത് പുരോഗമിക്കുകയാണ്. അവസാന നിമിഷത്തെ തിരക്കുകൾ ഒഴിവാക്കാനും തെറ്റുകളില്ലാതെ കൃത്യമായി ഫയലിങ് പൂർത്തിയാക്കാനും നികുതിദായകർക്കായി ആദായനികുതി വകുപ്പ് പ്രത്യേക മാർഗനിർദേശങ്ങൾ പുറപ്പെടുവിച്ചു.
റിട്ടേൺ ഫയൽ ചെയ്യുമ്പോൾ പ്രധാനമായും ശ്രദ്ധിക്കേണ്ട കാര്യങ്ങൾ താഴെ പറയുന്നവയാണ്:
1. ശരിയായ നികുതി വ്യവസ്ഥ തിരഞ്ഞെടുക്കുക
പഴയ നികുതി സമ്പ്രദായം (Old Tax Regime), പുതിയ നികുതി സമ്പ്രദായം (New Tax Regime) എന്നിവയിൽ ഏതാണ് നിങ്ങൾക്ക് കൂടുതൽ ലാഭകരമെന്ന് കൃത്യമായി താരതമ്യം ചെയ്ത് മാത്രം തിരഞ്ഞെടുക്കുക.
2. അനുയോജ്യമായ ഐടിആർ ഫോം (ITR Form) ഉപയോഗിക്കുക
വരുമാന സ്രോതസ്സ്, താമസം (ഇന്ത്യയിലാണോ വിദേശത്താണോ എന്നത്) തുടങ്ങിയവയുടെ അടിസ്ഥാനത്തിൽ ഏഴ് തരത്തിലുള്ള ഐടിആർ ഫോമുകളാണുള്ളത്. ഇതിൽ തെറ്റായ ഫോം ഉപയോഗിച്ചാൽ റിട്ടേൺ നിരസിക്കപ്പെടാൻ സാധ്യതയുണ്ട്.
3. രേഖകൾ മുൻകൂട്ടി ഒത്തുനോക്കുക
ഫയലിങ് ആരംഭിക്കുന്നതിന് മുൻപ് ആനുവൽ ഇൻഫർമേഷൻ സ്റ്റേറ്റ്മെന്റും (AIS), ഫോം 26AS-ഉം ഡൗൺലോഡ് ചെയ്ത് നിങ്ങളുടെ കൈവശമുള്ള വിവരങ്ങളുമായി ഒത്തുനോക്കണം. കൂടാതെ ഫോം 16, ബാങ്ക് സ്റ്റേറ്റ്മെന്റുകൾ, പലിശ സർട്ടിഫിക്കറ്റുകൾ, നിക്ഷേപ രേഖകൾ എന്നിവ കൈയിൽ കരുതുക.
4. പാൻ-ആധാർ ബന്ധിപ്പിക്കൽ
നിങ്ങളുടെ പാൻ (PAN), ആധാർ, ബാങ്ക് വിവരങ്ങൾ എന്നിവ കൃത്യമാണെന്ന് ഉറപ്പുവരുത്തുക. പാൻ കാർഡ് ആധാറുമായി നിർബന്ധമായും ബന്ധിപ്പിച്ചിരിക്കണം.
5. തെറ്റായ വിവരങ്ങൾ നൽകരുത്
ലഭ്യമായ നികുതി ഇളവുകൾ തെറ്റുകൂടാതെ രേഖപ്പെടുത്താൻ ശ്രദ്ധിക്കുക. കൂടുതൽ റീഫണ്ട് ലഭിക്കുന്നതിനായി വരുമാനം മറച്ചുവെക്കുന്നതോ തെറ്റായ ഇളവുകൾ കാണിക്കുന്നതോ നിയമവിരുദ്ധമാണ്. ഇത്തരം തെറ്റായ റിപ്പോർട്ടിങ് വലിയ രീതിയിലുള്ള അധിക നികുതി ചുമത്തുന്നതിനും നിയമനടപടികൾക്കും കാരണമായേക്കാം.
അവസാന നിമിഷം വരെ കാത്തിരിക്കരുത്: പോർട്ടലിലെ സാങ്കേതിക തകരാറുകൾ ഒഴിവാക്കാൻ അവസാന തീയതി വരെ കാത്തിരിക്കാതെ മുൻകൂട്ടി ഫയൽ ചെയ്യുക. കൃത്യസമയത്ത് ഫയൽ ചെയ്തില്ലെങ്കിൽ ലേറ്റ് ഫയലിങ് ഫീസും പലിശയും നൽകേണ്ടി വരും. കൂടാതെ, ഐടിആർ സമർപ്പിച്ച ശേഷം നിശ്ചിത ദിവസങ്ങൾക്കകം ‘ഇ-വെരിഫിക്കേഷൻ’ (e-Verification) നടത്തിയില്ലെങ്കിൽ റിട്ടേൺ സാധുവാകില്ലെന്ന കാര്യവും ഓർക്കുക.
