മലപ്പുറം: വീട്ടിലേക്കുള്ള വഴി സഞ്ചാരയോഗ്യമാക്കി നൽകുന്നില്ലെന്നാരോപിച്ച് മലപ്പുറം വാഴയൂർ പഞ്ചായത്ത് ഓഫീസിൽ പെട്രോൾ കുപ്പിയുമായി കുടുംബത്തിന്റെ ആത്മഹത്യാ ഭീഷണി. വാഴയൂർ സ്വദേശി ഗോപാലനും കുടുംബവുമാണ് പ്രതിഷേധവുമായി പഞ്ചായത്ത് ഓഫീസിലെത്തിയത്.
തങ്ങളുടെ വീട്ടിലേക്കുള്ള വഴി സഞ്ചാരയോഗ്യമാക്കി തരണമെന്നാവശ്യപ്പെട്ട് കഴിഞ്ഞ മൂന്ന് വർഷമായി പഞ്ചായത്ത് ഓഫീസിൽ കയറിയിറങ്ങുകയാണെന്ന് ഗോപാലനും കുടുംബവും പറയുന്നു. എന്നാൽ റോഡ് ഉൾപ്പെടുന്ന വഴി തങ്ങളുടെ ആസ്തി രജിസ്റ്ററിൽ ഉൾപ്പെട്ടിട്ടില്ലെന്നാണ് പഞ്ചായത്ത് അധികൃതർ നൽകുന്ന വിശദീകരണമെന്നും കുടുംബം ആരോപിച്ചു.
സംഭവം വിവാദമായതോടെ വാഴക്കാട് പോലീസ് സ്ഥലത്തെത്തി കുടുംബവുമായി ചർച്ച നടത്തി. പ്രശ്നത്തിന് എത്രയും വേഗം പരിഹാരം കാണാമെന്ന് പോലീസ് ഉറപ്പുനൽകിയതിനെ തുടർന്ന് നിലവിൽ സ്ഥിതിഗതികൾ ശാന്തമായിട്ടുണ്ട്.
