അബുദാബി: അന്താരാഷ്ട്ര തലത്തിൽ തങ്ങളുടെ ഡ്രൈവിങ് ലൈസൻസിന്റെ മൂല്യവും പദവിയും വീണ്ടും ഉയർത്തി യുഎഇ. ആഭ്യന്തര മന്ത്രാലയത്തിന്റെ പുതിയ പ്രഖ്യാപനപ്രകാരം യുഎഇ ലൈസൻസുള്ള പൗരന്മാർക്ക് ഇനി ലോകത്തിലെ 34 രാജ്യങ്ങളിൽ പരീക്ഷയോ പുതിയ ലൈസൻസോ ഇല്ലാതെ നിയമപരമായി വാഹനം ഓടിക്കാനാകും.
ഡ്രൈവിങ് ലൈസൻസുകളുടെ അംഗീകാരവും കൈമാറ്റവും നിയന്ത്രിക്കുന്ന മന്ത്രാലയത്തിന്റെ ‘മുർഖൂസ്’ (Murkhoos) സംരംഭത്തിലൂടെയാണ് വിദേശത്തുള്ള യുഎഇ പൗരന്മാർക്ക് ഈ വലിയ ഇളവുകൾ പ്രഖ്യാപിച്ചിരിക്കുന്നത്.
പ്രധാന നേട്ടങ്ങൾ:
-
ലൈസൻസ് മാറ്റിയെടുക്കാം: ഈ 34 രാജ്യങ്ങളിൽ താമസമാക്കിയ യുഎഇ പൗരന്മാർക്ക് ഡ്രൈവിങ് ടെസ്റ്റുകൾ കൂടാതെ തന്നെ തങ്ങളുടെ യുഎഇ ലൈസൻസ് അവിടുത്തെ പ്രാദേശിക ലൈസൻസായി എളുപ്പത്തിൽ മാറ്റി വാങ്ങാം.
-
സന്ദർശകർക്കും യാത്രികർക്കും ഇളവ്: ഈ രാജ്യങ്ങൾ സന്ദർശിക്കുന്ന വേളയിൽ പുതിയ ലൈസൻസിന് അപേക്ഷിക്കാതെ തന്നെ യുഎഇ ഡ്രൈവിങ് ലൈസൻസ് ഉപയോഗിച്ച് നിയമപരമായി വാഹനം ഓടിക്കാനും അനുമതിയുണ്ട്.
ഈ സൗകര്യം ലഭിക്കുന്ന രാജ്യങ്ങൾ:
യുകെ, ഓസ്ട്രിയ, ഡെന്മാർക്ക്, നെതർലൻഡ്സ്, പോളണ്ട്, ഫിൻലാൻഡ്, ക്രോയേഷ്യ, യുഎസിലെ ടെക്സസ് സംസ്ഥാനം, എസ്റ്റോണിയ, അൽബേനിയ, പോർച്ചുഗൽ, ചൈന, ഹംഗറി, ഗ്രീസ്, യുക്രെയ്ൻ, ബൾഗേറിയ, സ്ലൊവാക്യ, സ്ലൊവേനിയ, സെർബിയ, സൈപ്രസ്, ലാത്വിയ, ലക്സംബർഗ്, ലിത്വാനിയ, മാൾട്ട, ഐസ്ലാന്റ്, മോണ്ടിനെഗ്രോ, ഇസ്രയേൽ, അസർബൈജാൻ, ബെലാറസ്, ഉസ്ബക്കിസ്ഥാൻ, വടക്കൻ മാസിഡോണിയ, കൊസോവോ, കിർഗിസ്ഥാൻ, ദക്ഷിണ കൊറിയ.
(ശ്രദ്ധിക്കുക: ദക്ഷിണ കൊറിയയിൽ നിലവിൽ യുഎഇ ലൈസൻസ് അവിടുത്തെ താമസക്കാർക്ക് (Residents) മാത്രമേ കൈമാറ്റം ചെയ്യാൻ അനുവാദമുള്ളൂ).
