തിരുവനന്തപുരം: ശബരിമലയിൽ നടക്കുന്ന ചിങ്ങമാസ പൂജ, ഓണം പൂജ എന്നിവയോടനുബന്ധിച്ച് അയ്യപ്പഭക്തരുടെ യാത്ര സുഗമവും സുരക്ഷിതവുമാക്കാൻ കെ.എസ്.ആർ.ടി.സി വിപുലമായ യാത്രാ ക്രമീകരണങ്ങൾ ഏർപ്പെടുത്തി. ഓഗസ്റ്റ് 16 മുതൽ 28 വരെ വിവിധ യൂണിറ്റുകളിൽ നിന്ന് പമ്പയിലേക്കും തിരിച്ചും പ്രത്യേക സർവീസുകൾ നടത്തും. തിരുവനന്തപുരം, ചെങ്ങന്നൂർ, പത്തനംതിട്ട, കൊട്ടാരക്കര, എരുമേലി, പുനലൂർ തുടങ്ങിയ പ്രധാന കേന്ദ്രങ്ങളിൽ നിന്നാണ് ആവശ്യാനുസരണം സർവീസുകൾ ക്രമീകരിച്ചിരിക്കുന്നത്.
ചെങ്ങന്നൂരും നിലയ്ക്കലും പ്രത്യേക ക്രമീകരണം: ട്രെയിൻ മാർഗം ചെങ്ങന്നൂർ റെയിൽവേ സ്റ്റേഷനിൽ എത്തുന്ന ഭക്തരുടെ തിരക്ക് പരിഗണിച്ച് ചെങ്ങന്നൂർ – പമ്പ റൂട്ടിൽ ഏത് സമയത്തും ആവശ്യത്തിനനുസരിച്ച് സർവീസുകൾ ലഭ്യമാക്കും. ഇതോടൊപ്പം തീർഥാടകരുടെ യാത്ര സുഗമമാക്കുന്നതിനായി നിലയ്ക്കൽ – പമ്പ ചെയിൻ സർവീസുകളും വിപുലമായി ക്രമീകരിച്ചിട്ടുണ്ട്. തിരുവനന്തപുരം സെൻട്രൽ ഡിപ്പോയിൽ നിന്ന് മുൻകൂട്ടി ബസുകൾ ബുക്ക് ചെയ്യാനുള്ള സൗകര്യവുമുണ്ട്.
അടിയന്തര സഹായത്തിന് ബന്ധപ്പെടാം: തിരക്ക് വർധിക്കുന്നതനുസരിച്ച് സമീപ യൂണിറ്റുകളിൽ നിന്ന് അധിക സർവീസുകൾ ലഭ്യമാക്കുമെന്ന് അധികൃതർ അറിയിച്ചു. സംശയങ്ങൾക്കും വിവരങ്ങൾക്കുമായി ബന്ധപ്പെടേണ്ട ഫോൺ നമ്പറുകൾ:
-
പമ്പ: 04735203445, 9497024092
-
ചെങ്ങന്നൂർ: 9188933750
-
പത്തനംതിട്ട: 9188933744
-
കൺട്രോൾ റൂം (24 മണിക്കൂറും): 9447071021, 04712463799
#Sabarimala #KSRTC #ChingamPooja #OnamPooja #PambaSpecialServices #KeralaNews #MalayalamNews
