കടം വാങ്ങിയ തുക തിരികെ നൽകാത്ത സുഹൃത്തിന്റെ ജന്മദിനാശംസ പോസ്റ്റ് പരസ്യമായി പങ്കുവെച്ച് നടൻ ബിനീഷ് ബാസ്റ്റിൻ. തനിക്ക് ജന്മദിനാശംസകൾ നേർന്ന സുഹൃത്തിന് സോഷ്യൽ മീഡിയയിലൂടെ തന്നെയാണ് ബിനീഷ് രൂക്ഷമായ ഭാഷയിൽ മറുപടി നൽകിയത്.
“ഈ ബന്ധത്തിന്റെ വില തിരിച്ചറിയുന്ന ഒരു സമയം വരും. എന്റെ പ്രിയപ്പെട്ട സഹോദരൻ ബിനീഷ് ബാസ്റ്റിന് ഒരായിരം പിറന്നാൾ ആശംസകൾ” എന്നായിരുന്നു സുഹൃത്തിന്റെ ആശംസ പോസ്റ്റ്. ഈ പോസ്റ്റ് പങ്കുവെച്ചുകൊണ്ടാണ് തങ്ങൾ തമ്മിലുള്ള സൗഹൃദം വഷളാകാനുണ്ടായ കാരണം ബിനീഷ് വെളിപ്പെടുത്തിയത്.
ബിനീഷ് ബാസ്റ്റിന്റെ വാക്കുകൾ:
“ബർത്ത് ഡേ വിഷ് ചെയ്തതിന് വളരെ സന്തോഷം. ഓട്ടോറിക്ഷയുടെ ഇൻഷുറൻസും ടെസ്റ്റും മുടങ്ങിയിട്ട് ഒരുപാട് നാളായി എന്ന് പറഞ്ഞ് എന്റെ കയ്യിൽ നിന്ന് വലിയൊരു തുക കടമായി മേടിച്ചു. പറഞ്ഞ തീയതിയും കഴിഞ്ഞ് വീണ്ടും രണ്ടു മാസം കഴിഞ്ഞ് ചോദിച്ചപ്പോൾ ‘മേടിക്കാൻ പറ്റുമെങ്കിൽ മേടിച്ചോ’ എന്നായിരുന്നു മറുപടി.”
പിന്നീട് തന്റെ കല്യാണ ആവശ്യങ്ങൾക്കായി നിരവധി തവണ ഇദ്ദേഹത്തെ വിളിച്ച് മടുത്തുവെന്നും ബിനീഷ് പറയുന്നു. “അതിനു ശേഷം 90 ശതമാനം പൈസ തന്നു. ഞാൻ സുഹൃത്ത് എന്ന നിലയിൽ സഹായിച്ചതാണ്, അല്ലാതെ പലിശയ്ക്ക് കൊടുത്ത പൈസയല്ല. ലോട്ടറി അടിച്ചാൽ പോലും കടം മേടിച്ച പൈസ തിരിച്ചു തരാത്ത ആൾക്കാരാണ് നമ്മുടെ ഇടയിൽ ഉള്ളത്,” ബിനീഷ് കുറിച്ചു.
ഇനിയും തനിക്ക് ബാക്കി തുക തരാനുണ്ടെന്ന് വ്യക്തമാക്കിയ താരം, അധ്വാനിച്ച് തന്നെയാണ് താനും പണമുണ്ടാക്കുന്നതെന്ന് ഓർമ്മിപ്പിച്ചു. നുണ പറഞ്ഞ് പണം വാങ്ങിയതാണ് ഈ സൗഹൃദം അവസാനിപ്പിക്കാൻ കാരണമെന്നും, തരാനുള്ള ബാക്കി തുക തന്നതിന് ശേഷം മാത്രം പഴയ സൗഹൃദം പുതുക്കാമെന്നും വ്യക്തമാക്കിക്കൊണ്ടാണ് നടൻ പോസ്റ്റ് അവസാനിപ്പിക്കുന്നത്.
