തമിഴ് സിനിമാ ലോകത്ത് ഒരുകാലത്ത് നായികാ സങ്കൽപ്പങ്ങളുടെ തന്നെ പര്യായമായിരുന്നു ഖുശ്ബു. കുടുംബജീവിതത്തിലേക്ക് കടന്നതോടെ അഭിനയത്തിൽ നിന്ന് ഇടവേളയെടുക്കുകയും പിന്നീട് നിർമ്മാണ രംഗത്തേക്കും ടെലിവിഷൻ പരമ്പരകളിലേക്കും ചുവടുവെക്കുകയുമായിരുന്നു താരം. ഇപ്പോൾ തനിക്ക് ഒന്നാമത്തെ പരിഗണന കുടുംബം തന്നെയാണെന്ന് വ്യക്തമാക്കുന്ന ഖുശ്ബു, ഇന്നത്തെ സിനിമയിലെ തന്റെ പ്രിയപ്പെട്ട നടിമാരെക്കുറിച്ച് തുറന്നുപറയുന്നു.
നാല് മുൻനിര നടിമാരുടെ പേരുകളാണ് ഖുശ്ബു എടുത്തുപറഞ്ഞത്: നിത്യ മേനോൻ, സായി പല്ലവി, തൃഷ കൃഷ്ണൻ, നയൻതാര.
“അഭിനയം കണ്ടുകൊണ്ടിരിക്കാൻ രസമാണ്”
സായി പല്ലവിയുടെയും നിത്യ മേനോന്റെയും അഭിനയം തനിക്ക് ഏറെ പ്രിയപ്പെട്ടതാണെന്ന് ഖുശ്ബു പറയുന്നു. “എനിക്ക് നിത്യ മേനോനെയും സായി പല്ലവിയെയും ഒരുപാട് ഇഷ്ടമാണ്. അവർ സ്ക്രീനിൽ അഭിനയിക്കുന്നത് കണ്ടുകൊണ്ടിരിക്കാൻ തന്നെ വലിയ രസമാണ്,” ഖുശ്ബു വ്യക്തമാക്കി.
സൗന്ദര്യത്തിൽ തൃഷ; ഹാർഡ് വർക്കിൽ നയൻതാര
സൗന്ദര്യത്തെക്കുറിച്ച് ചോദിച്ചാൽ തനിക്ക് ഏറ്റവും ഇഷ്ടം തൃഷയെയാണെന്ന് താരം തുറന്നുപറഞ്ഞു. “ഇവളെന്താണ് ഇപ്പോഴും ഇത്ര സൗന്ദര്യത്തോടെ ഇരിക്കുന്നത് എന്ന് ഞാൻ ചിന്തിക്കാറുണ്ട്.” സിനിമാ ജീവിതത്തിന് മുൻപ് തൃഷ മിസ്സ് ചെന്നൈ ആയ കാലം മുതൽക്കേയുള്ള സൗഹൃദമുണ്ട്. ഖുശ്ബുവിനേക്കാൾ മക്കളാണ് തൃഷയുമായി വലിയ സൗഹൃദം സൂക്ഷിക്കുന്നത്. മകളുടെ വിവാഹത്തിലും നിറസാന്നിധ്യമായിരുന്നു തൃഷ.
നയൻതാരയുടെ അധ്വാനത്തെയും അർപ്പണബോധത്തെയും കുറിച്ച് ഖുശ്ബുവിന് പറയാനുള്ളത് വലിയ പ്രശംസയാണ്:
“നയൻതാരയിൽ എനിക്കിഷ്ടം അവരുടെ ഹാർഡ് വർക്ക് ആണ്. ഏത് നിലയിൽ നിന്നാണ് അവർ ഇപ്പോഴത്തെ ലേഡി സൂപ്പർസ്റ്റാർ പദവിയിലേക്ക് എത്തിയത് എന്നത് വലിയ അഭിമാനത്തോടെയാണ് ഞാൻ കാണുന്നത്. ഒരു പെണ്ണിനെക്കൊണ്ട് സാധിക്കും എന്ന് നയൻതാര തെളിയിച്ചു. വീണുപോയ ഇടത്തുനിന്ന് പവർഫുളായി തിരികെ വരാൻ കഴിഞ്ഞതാണ് നയൻതാരയോടുള്ള ഇഷ്ടത്തിന് കാരണം.”
അതുപോലെ നയൻതാരയുടെ കൃത്യനിഷ്ഠയും എടുത്തുപറയേണ്ടതാണെന്ന് ഖുശ്ബു കൂട്ടിച്ചേർത്തു. 7 മണിക്ക് ഷോട്ട് പറഞ്ഞാൽ 6.45-ന് മേക്കപ്പ് ഒക്കെ പൂർത്തിയാക്കി സെറ്റിൽ എത്തുന്ന ആളാണ് നയൻതാര. ഖുശ്ബുവിന്റെ ഭർത്താവ് സുന്ദർ സി സംവിധാനം ചെയ്യുന്ന പുതിയ ചിത്രമായ ‘മൂക്കുത്തി അമ്മൻ 2’ വിലെ നായിക കൂടിയാണ് നയൻതാര.
