Img credit - Alcohol mrketing agency
2026 ഫിഫ ലോകകപ്പ് ഫുട്ബോൾ ആവേശം അമേരിക്കൻ മൈതാനങ്ങളിൽ മാത്രമല്ല, അവിടുത്തെ ബാറുകളിലും പബ്ബുകളിലും വൻ സാമ്പത്തിക ചലനമാണ് സൃഷ്ടിക്കുന്നത്. കഴിഞ്ഞ കുറച്ചു വർഷങ്ങളായി വിൽപനയിൽ വലിയ ഇടിവ് നേരിട്ടിരുന്ന അമേരിക്കൻ ബിയർ വിപണിക്ക് പുതിയ ജീവശ്വാസം നൽകിയിരിക്കുകയാണ് ലോകകപ്പ് മൽസരങ്ങൾ. കളി നടക്കുന്ന പ്രധാന നഗരങ്ങളിലെല്ലാം ബിയർ വിൽപന റെക്കോർഡ് കുതിപ്പാണ് രേഖപ്പെടുത്തുന്നത്.
പ്രശസ്തമായ ‘ബിയർ ഇൻസ്റ്റിറ്റ്യൂട്ടിന്റെ’ ഏറ്റവും പുതിയ കണക്കുകൾ പ്രകാരം, ലോകകപ്പ് മത്സരങ്ങൾക്ക് വേദിയാകുന്ന നഗരങ്ങളിലെ റെസ്റ്റോറന്റുകൾ, പബ്ബുകൾ, ബാറുകൾ എന്നിവിടങ്ങളിൽ ബിയർ വിൽപനയിൽ 15.4 ശതമാനത്തിന്റെ വൻ വർധനവാണ് ഉണ്ടായിരിക്കുന്നത്. അമേരിക്കയിലാകെ ഒൺ-ട്രേഡ് ബിയർ വിൽപനയിൽ 5.5 ശതമാനം വളർച്ച രേഖപ്പെടുത്തി.
കുപ്പികളിലും കാനുകളിലുമായി വിൽക്കുന്ന പാക്കേജ്ഡ് ബിയറിന് 19.2 ശതമാനമാണ് ഡിമാൻഡ് വർധിച്ചത്. എന്നാൽ ടാപ്പുകളിൽ നിന്ന് നേരിട്ട് നൽകുന്ന ‘ഡ്രാഫ്റ്റ് ബിയറിനാണ്’ (Draft Beer) ആരാധകർക്കിടയിൽ പ്രിയം കൂടുതൽ. മത്സരമുള്ള നഗരങ്ങളിൽ ഡ്രാഫ്റ്റ് ബിയർ വിൽപന 14.21 ശതമാനം വർധിച്ചപ്പോൾ, മറ്റ് പ്രദേശങ്ങളിൽ 6.21 ശതമാനമാണ് വളർച്ച.
മറ്റ് സ്ഥലങ്ങളെ അപേക്ഷിച്ച് സ്റ്റേഡിയങ്ങളിൽ ബിയറിന് വലിയ വിലയാണ് ഈടാക്കുന്നത്. ഒരു ബിയറിന് 15 മുതൽ 20 ഡോളർ വരെയാണ് സ്റ്റേഡിയങ്ങളിലെ വില (ഏകദേശം 1440 രൂപ മുതൽ 1920 രൂപ വരെ). പുറത്ത് കുറഞ്ഞ വിലയ്ക്ക് ബിയർ ലഭ്യമാണെങ്കിലും, കളി നേരിട്ട് കാണുന്ന ആവേശത്തിൽ സ്റ്റേഡിയങ്ങളിൽ നിന്ന് ഉയർന്ന വില നൽകി ബിയർ വാങ്ങാൻ ആരാധകർക്ക് യാതൊരു മടിയുമില്ലെന്നാണ് കണക്കുകൾ വ്യക്തമാക്കുന്നത്. ഇതേത്തുടർന്ന് സ്റ്റേഡിയങ്ങളിലെ മാത്രം വിൽപനയിൽ 22 ശതമാനം വർധനവുണ്ടായി.
മസാച്യുസെറ്റ്സിലെ ബാറുകളിലും റെസ്റ്റോറന്റുകളിലും ലോകകപ്പിന്റെ ആദ്യ ആഴ്ചകളിൽ വിൽപനയിൽ 27.5 ശതമാനത്തിന്റെ വർധനവുണ്ടായി. സ്കോട്ലൻഡ് ടീമിന്റെ ആരാധകരുടെ വരവാണ് ബോസ്റ്റണിൽ വിൽപന കുത്തനെ ഉയർത്തിയത്. ഇവിടെ തിരക്ക് കൂടിയതോടെ പല പ്രമുഖ ടാപ്പ്റൂമുകളിലും അടിയന്തരമായി പുതിയ ബിയർ സ്റ്റോക്കുകൾ എത്തിക്കേണ്ടി വന്നു.
കാലിഫോർണിയയിലെ സോഫി സ്റ്റേഡിയത്തിലും ലെവീസ് സ്റ്റേഡിയത്തിലും നടന്ന മത്സരങ്ങളും ബിയർ കമ്പനികൾക്ക് വലിയ ലാഭമുണ്ടാക്കി. കാലിഫോർണിയ സംസ്ഥാനത്തെ ഒൺ-ട്രേഡ് ബിയർ വിൽപന 17.9 ശതമാനമാണ് ഉയർന്നത്. ആറ് മത്സരങ്ങൾക്ക് വേദിയായ ഫിലാഡൽഫിയയിൽ ഇതിനോടകം 2,90,000-ത്തിലധികം ബിയറുകളാണ് ആരാധകർ കുടിച്ചുതീർത്തത്.
ലോകകപ്പ് മത്സരങ്ങൾ നടക്കാത്ത അമേരിക്കയിലെ മറ്റ് സംസ്ഥാനങ്ങളിലും ആളുകൾ സ്പോർട്സ് ബാറുകളിലും മറ്റും കളി കാണാൻ ഒത്തുചേരുന്നതിനാൽ പാനീയങ്ങളുടെ വിൽപനയിൽ 1 മുതൽ 3 ശതമാനം വരെ വർധനവുണ്ടായിട്ടുണ്ട്. വരും ദിവസങ്ങളിൽ കൂടുതൽ ആവേശകരമായ നോക്കൗട്ട് മത്സരങ്ങൾ നടക്കാനിരിക്കുന്നതിനാൽ അമേരിക്കൻ ബിയർ വിപണിക്ക് ഈ ലോകകപ്പ് ചരിത്രത്തിലെ ഏറ്റവും വലിയൊരു സാമ്പത്തിക നേട്ടമായി മാറുമെന്നാണ് വ്യവസായ മേഖലയുടെ വിലയിരുത്തൽ.
