കോഴിക്കോട്: കുറ്റ്യാടി നിറ്റൂരിൽ മൂന്ന് യുവാക്കൾക്ക് വെട്ടേറ്റു. നിറ്റൂർ മൊട്ടന്തറ സ്വദേശികളായ ഷോഷിൻ, ബബിൻ, അശ്വിൻ എന്നിവർക്കാണ് വെട്ടേറ്റത്. ഞായറാഴ്ച രാത്രി 10 മണിയോടെ മൊട്ടന്തറയിൽ വെച്ചായിരുന്നു സംഭവം. ബൈക്കുകളിലായി എത്തിയ പത്തിലധികം പേരടങ്ങുന്ന സംഘം വാക്കത്തി ഉപയോഗിച്ച് യുവാക്കളെ ക്രൂരമായി ആക്രമിക്കുകയായിരുന്നു.
ഒരു യുവതിയുമായി ബന്ധപ്പെട്ട തർക്കമാണ് ആക്രമണത്തിന് പിന്നിലെ പ്രധാന കാരണം. ഈ വിഷയത്തിൽ അക്രമി സംഘവും ആക്രമിക്കപ്പെട്ട യുവാക്കളും തമ്മിൽ നേരത്തെയും വാക്കുതർക്കങ്ങൾ ഉണ്ടായിരുന്നു. ഈ വ്യക്തിവൈരാഗ്യമാണ് പിന്നീട് വൻ സംഘർഷത്തിലും യുവാക്കളെ വെട്ടിപ്പരിക്കേൽപ്പിക്കുന്നതിലും കലാശിച്ചത്.
ആക്രമണത്തിൽ പരിക്കേറ്റ ഷോഷിൻ, ബബിൻ എന്നിവരെ കോഴിക്കോട് മെഡിക്കൽ കോളേജ് ആശുപത്രിയിലും അശ്വിനെ തൊട്ടിൽപ്പാലത്തെ സ്വകാര്യ ആശുപത്രിയിലുമാണ് പ്രവേശിപ്പിച്ചിരിക്കുന്നത്. യുവാക്കളുടെ പരിക്ക് ഗുരുതരമല്ലെന്നാണ് ആശുപത്രി അധികൃതരിൽ നിന്നും പോലീസിൽ നിന്നും ലഭിക്കുന്ന പ്രാഥമിക വിവരം.
സംഭവമറിഞ്ഞയുടൻ കുറ്റ്യാടി പോലീസ് സ്ഥലത്തെത്തി അന്വേഷണം ആരംഭിച്ചു. അതിനിടെ നാട്ടുകാർ ഇടപെട്ട് അക്രമി സംഘത്തിൽപ്പെട്ട ശ്രീജിത്ത് എന്നയാളെ പിടികൂടി പോലീസിന് കൈമാറി. ഇയാളെ നിലവിൽ പോലീസ് കസ്റ്റഡിയിലെടുത്ത് ചോദ്യം ചെയ്തുവരികയാണ്. ബാക്കിയുള്ള അക്രമികളെക്കുറിച്ച് കൃത്യമായ സൂചനകൾ ലഭിച്ചിട്ടുണ്ടെന്നും അവരെ ഉടൻ തന്നെ അറസ്റ്റ് ചെയ്യുമെന്നും പോലീസ് വ്യക്തമാക്കി.
