മഴക്കാല രോഗങ്ങളെ പടിക്കുപുറത്താക്കാൻ ഒരു കപ്പ് ‘മുളക് രസം’; പ്രതിരോധശേഷി കൂട്ടാനുള്ള എളുപ്പവഴി

മഴക്കാലം എത്തിയാൽ അന്തരീക്ഷത്തിലെ ഈർപ്പവും താപനിലയിലെ വ്യതിയാനങ്ങളും കാരണം ജലദോഷം, തൊണ്ടവേദന, മൂക്കടപ്പ്, ദഹനസംബന്ധമായ അസ്വസ്ഥതകൾ തുടങ്ങിയ ആരോഗ്യപ്രശ്നങ്ങൾ സാധാരണമാണ്. ഇത്തരം സാഹചര്യങ്ങളിൽ നമ്മുടെ പൂർവികർ ആശ്രയിച്ചിരുന്ന ഏറ്റവും മികച്ച വീട്ടുവൈദ്യങ്ങളിൽ ഒന്നാണ് മുളക് രസം. കറിയായോ സൂപ്പായോ ഉപയോഗിക്കാവുന്ന ഈ പരമ്പരാഗത വിഭവം ശരീരത്തിന് ചൂടും മികച്ച രോഗപ്രതിരോധ ശേഷിയും നൽകുന്നു.

പ്രധാന ചേരുവകളുടെ ഔഷധഗുണങ്ങൾ:

• കുരുമുളക്: ഇതിലടങ്ങിയിരിക്കുന്ന ‘പൈപ്പറിൻ’ ശരീരത്തിലെ മെറ്റബോളിസം മെച്ചപ്പെടുത്തുകയും പ്രതിരോധശേഷി വർധിപ്പിക്കുകയും ചെയ്യുന്നു. മഴക്കാലത്തുണ്ടാകുന്ന മൂക്കടപ്പ്, ചുമ, തൊണ്ടയിലെ അസ്വസ്ഥത എന്നിവയ്ക്ക് ഇത് മികച്ച ആശ്വാസമാണ്.

• ജീരകം: ദഹനപ്രക്രിയ സുഗമമാക്കാനും വയറുവേദന, ഗ്യാസ് തുടങ്ങിയ പ്രശ്നങ്ങൾ കുറയ്ക്കാനും സഹായിക്കുന്നു.

• വെളുത്തുള്ളി: ധാരാളം ആന്റിബാക്ടീരിയൽ, ആന്റിവൈറൽ ഗുണങ്ങളുള്ള വെളുത്തുള്ളി ശരീരത്തിന്റെ സ്വാഭാവിക പ്രതിരോധശേഷി ശക്തമാക്കുന്നു.

ആവശ്യമായ ചേരുവകൾ:

• കുരുമുളക് – 1 ടീസ്പൂൺ

• ജീരകം – 1 ടീസ്പൂൺ

• വെളുത്തുള്ളി – 5 മുതൽ 6 അല്ലി വരെ

• പുളി – ചെറിയ നാരങ്ങയുടെ വലുപ്പം

• തക്കാളി – 1 എണ്ണം

• മഞ്ഞൾപ്പൊടി – ഒരു നുള്ള്

• കായം – ഒരു നുള്ള്

• കടുക് –1/4 ടീസ്പൂൺ

• വറ്റൽമുളക് – 1 എണ്ണം

• കറിവേപ്പില, മല്ലിയില, ഉപ്പ്, എണ്ണ/നെയ്യ് – ആവശ്യത്തിന്

• വെള്ളം – 3 മുതൽ 4 കപ്പ് വരെ

തയ്യാറാക്കുന്ന വിധം:

1. ആദ്യം കുരുമുളകും ജീരകവും വെളുത്തുള്ളിയും ഒന്നിച്ച് ചതച്ചെടുക്കുക.

2. പുളി വെള്ളത്തിൽ പിഴിഞ്ഞെടുത്ത ശേഷം അതിലേക്ക് ചതച്ചുവെച്ച മിശ്രിതവും മഞ്ഞൾപ്പൊടിയും ഉപ്പും ചെറുതായി അരിഞ്ഞ തക്കാളിയും ചേർത്ത് നന്നായി തിളപ്പിക്കുക.

3. ഏകദേശം 10-15 മിനിറ്റ് തിളച്ച ശേഷം തീ കുറയ്ക്കുക.

4. മറ്റൊരു പാനിൽ എണ്ണയോ നെയ്യോ ചൂടാക്കി കടുക് പൊട്ടിക്കുക. അതിലേക്ക് വറ്റൽമുളക്, കറിവേപ്പില, കായം എന്നിവ ചേർത്ത് താളിച്ചെടുക്കുക.

5. ഈ താളിപ്പ് രസത്തിലേക്ക് ഒഴിച്ച് ഒരു മിനിറ്റ് കൂടി ചൂടാക്കിയ ശേഷം മല്ലിയില വിതറി വാങ്ങാം.

മഴക്കാലത്ത് കഴിക്കുന്നതുകൊണ്ടുള്ള ഗുണങ്ങൾ:

• കുരുമുളകിന്റെ ചൂട് മൂക്കടപ്പ് മാറ്റാനും ശ്വാസനാളങ്ങൾ തുറക്കാനും സഹായിക്കുന്നു.

• ദഹനരസങ്ങളുടെ ഉൽപ്പാദനം വർധിപ്പിച്ച് ഭക്ഷണം എളുപ്പത്തിൽ ദഹിപ്പിക്കുന്നു.

• കാലാവസ്ഥാ വ്യതിയാനം മൂലമുണ്ടാകുന്ന തണുപ്പിൽ ശരീരത്തിന്റെ താപനില നിലനിർത്തുന്നു.

• രസത്തിന്റെ സുഗന്ധം വിശപ്പ് വർധിപ്പിക്കാൻ സഹായിക്കുന്നു.

ചൂടുചോറിനൊപ്പമോ അല്ലെങ്കിൽ വെറുതെ ഒരു സൂപ്പായി കുടിക്കാനോ പറ്റിയ മുളക് രസം മഴക്കാല ആരോഗ്യസംരക്ഷണത്തിന് ഏറെ ഉത്തമമാണ്.

#rasamrecipe#mulakrasam#mansoonhealthtips