രാജ്യാന്തര യാത്രാമേഖലയെയും പ്രവാസികളെയും വലിയ രീതിയിൽ സ്വാധീനിക്കുന്ന വൻ വിസ പരിഷ്കരണങ്ങളുമായി ലോകരാജ്യങ്ങൾ രംഗത്ത്. യുഎഇയും കുവൈറ്റും ഉൾപ്പെടെയുള്ള ഗൾഫ് രാഷ്ട്രങ്ങൾ വിസ നടപടികൾ കൂടുതൽ ലളിതമാക്കി പ്രവാസികളെയും നിക്ഷേപകരെയും ആകർഷിക്കാനുള്ള ശ്രമത്തിലാണ്. എന്നാൽ യുഎസ്, യുകെ, ഓസ്ട്രേലിയ, ജപ്പാൻ തുടങ്ങിയ രാജ്യങ്ങൾ വിസാ ഫീസുകൾ കുത്തനെ കൂട്ടിയും ഇമിഗ്രേഷൻ നിയമങ്ങൾ കർശനമാക്കിയുമാണ് നിയന്ത്രണങ്ങൾ ഏർപ്പെടുത്തുന്നത്. ഡിജിറ്റൽ സംവിധാനങ്ങൾക്ക് മുൻഗണന നൽകി ടൂറിസം, തൊഴിൽ മേഖലകളെ പുനർനിർമ്മിക്കുകയാണ് പുതിയ വിസാ നയങ്ങളിലൂടെ വിവിധ സർക്കാരുകൾ ലക്ഷ്യമിടുന്നത്.
പ്രവാസികൾക്കും വിനോദസഞ്ചാരികൾക്കും ഏറെ ആശ്വാസം നൽകുന്ന മാറ്റങ്ങളാണ് ഗൾഫ് മേഖലയിൽ നിന്നും പുറത്തുവരുന്നത്. കൂടുതൽ വിദേശികൾക്ക് വിസ ഓൺ അറൈവൽ നൽകുന്നതിനായി യുഎഇ തങ്ങളുടെ മാനദണ്ഡങ്ങൾ വിപുലീകരിച്ചു. നിലവിലുള്ളവർക്ക് പുറമെ ഇന്തോനേഷ്യ, വിയറ്റ്നാം, തായ്ലൻഡ്, ഫിലിപ്പീൻസ്, കെനിയ, ദക്ഷിണാഫ്രിക്ക എന്നീ ആറ് രാജ്യങ്ങളിലെ പൗരന്മാർക്ക് കൂടി ഇനി ഈ ആനുകൂല്യം ലഭിക്കും. കൂടാതെ ദുബായിൽ പ്രോപ്പർട്ടി നിക്ഷേപകർക്കുള്ള റെസിഡൻസി വിസ നിയമങ്ങളിലും ഇളവുകൾ പ്രഖ്യാപിച്ചിട്ടുണ്ട്. അയൽരാജ്യമായ കുവൈറ്റാകട്ടെ, വിദേശ നിക്ഷേപകരെ ആകർഷിക്കാൻ 15 വർഷം വരെ കാലാവധിയുള്ള പുതിയ ദീർഘകാല റെസിഡൻസി പദ്ധതിയും ആരംഭിച്ചു കഴിഞ്ഞു.
പാശ്ചാത്യ രാജ്യങ്ങളിൽ വിസ ചെലവേറും; നിയമങ്ങൾ കടുപ്പമാകും
ഗൾഫ് മേഖലയ്ക്ക് പുറത്ത് വിസ നടപടികൾ കൂടുതൽ സങ്കീർണ്ണവും ചെലവേറിയതുമാവുകയാണ്. ജപ്പാൻ 1978-ന് ശേഷം ആദ്യമായി വിസാ ഫീസ് അഞ്ചിരട്ടിയായി വർദ്ധിപ്പിച്ചു. ഇതോടെ സിംഗിൾ എൻട്രി ഫീസ് 15,000 ജാപ്പനീസ് യെന്നായി (ഏകദേശം 8,800 രൂപ) ഉയർന്നു. യുഎസ് എംബസികളിൽ അധിക തുക നൽകിയാൽ 10 ദിവസത്തിനകം ഇന്റർവ്യൂ ലഭിക്കുന്ന ‘ഫാസ്റ്റ് ട്രാക്ക് വിസ’ സംവിധാനം നിലവിൽ വന്നെങ്കിലും കുടിയേറ്റ നിയമങ്ങൾ കർശനമാക്കുന്നതിന്റെ ഭാഗമായി കടുത്ത പരിശോധനകളാണ് ട്രംപ് ഭരണകൂടം ഏർപ്പെടുത്തുന്നത്.
അന്താരാഷ്ട്ര വിദ്യാർത്ഥികൾക്ക് കനത്ത തിരിച്ചടി നൽകിക്കൊണ്ട് യുകെ തങ്ങളുടെ പോസ്റ്റ് സ്റ്റഡി വർക്ക് വിസ രണ്ട് വർഷത്തിൽ നിന്ന് 18 മാസമായി കുറയ്ക്കാനും വിദഗ്ദ്ധ തൊഴിലാളികളുടെ സ്പോൺസർഷിപ്പ് നിയമങ്ങൾ കർശനമാക്കാനുമുള്ള ഒരുക്കത്തിലാണ്. ഓസ്ട്രേലിയയും സ്കിൽഡ് വർക്കർ വിസകൾക്കുള്ള മിനിമം ശമ്പള പരിധി കുത്തനെ ഉയർത്തിയിട്ടുണ്ട്. ഇതോടെ വിദേശ തൊഴിലാളികൾക്ക് ഓസ്ട്രേലിയയിൽ വിസ യോഗ്യത നേടുക പ്രയാസകരമാകും.
ഡിജിറ്റൽ യുഗത്തിലേക്ക് ഷെങ്കൻ വിസ; മറ്റ് രാജ്യങ്ങളിലെ മാറ്റങ്ങൾ
യൂറോപ്പിലെ ഷെങ്കൻ മേഖലയിലാകെ പാസ്പോർട്ട് സ്റ്റാമ്പിംഗിന് പകരം വിരലടയാളവും ബയോമെട്രിക് വിവരങ്ങളും ശേഖരിക്കുന്ന ഡിജിറ്റൽ എൻട്രി/എക്സിറ്റ് സിസ്റ്റം പൂർണ്ണമായും പ്രവർത്തനക്ഷമമായിക്കഴിഞ്ഞു. അതേസമയം ഏഷ്യൻ മേഖലയിൽ, ചൈന തങ്ങളുടെ വിസ രഹിത പ്രവേശന പദ്ധതി 40-ലധികം രാജ്യങ്ങളിലെ പൗരന്മാർക്കായി ഈ വർഷം അവസാനം വരെ നീട്ടിയിട്ടുണ്ട്. മറ്റൊരു ടൂറിസ്റ്റ് കേന്ദ്രമായ വിയറ്റ്നാം സന്ദർശിക്കുന്നവർക്ക് യാത്രയ്ക്ക് ഏഴ് ദിവസം മുൻപുള്ള ഡിജിറ്റൽ ആരോഗ്യ പ്രഖ്യാപനവും സർക്കാർ നിർബന്ധമാക്കി. ലോകമെമ്പാടും മാറിയ ഈ വിസ നിയമങ്ങൾ പ്രവാസികളുടെയും രാജ്യാന്തര യാത്രക്കാരുടെയും ഉപരിപഠന-തൊഴിൽ മോഹങ്ങളെ വരും ദിവസങ്ങളിൽ വലിയ രീതിയിൽ സ്വാധീനിക്കും.
