വിരമിക്കൽ കാലത്തെ സാമ്പത്തിക സുരക്ഷിതത്വം ഇന്ന് ഭൂരിഭാഗം ആളുകളും ഗൗരവമായി കാണുന്ന ഒന്നാണ്. ജോലിയിൽ പ്രവേശിക്കുന്ന കാലം മുതൽ തന്നെ റിട്ടയർമെന്റ് പ്ലാനിങ് ആരംഭിക്കുന്നത് ഭാവിയിൽ സാമ്പത്തിക ബുദ്ധിമുട്ടുകൾ ഒഴിവാക്കാൻ സഹായിക്കുമെന്ന് വിപണി വിദഗ്ധർ ചൂണ്ടിക്കാണിക്കുന്നു. സംഘടിത-അസംഘടിത മേഖലകളിലുള്ളവർക്കായി സർക്കാർ പിന്തുണയോടെയും വിപണിയുമായി ബന്ധിപ്പിച്ചും നടപ്പിലാക്കുന്ന പ്രധാനപ്പെട്ട 8 നിക്ഷേപ പദ്ധതികൾ താഴെ പറയുന്നവയാണ്:
1. നാഷണൽ പെൻഷൻ സിസ്റ്റം (NPS)
സർക്കാർ പിന്തുണയുള്ള ഒരു മാർക്കറ്റ് ലിങ്ക്ഡ് ദീർഘകാല നിക്ഷേപ പദ്ധതിയാണിത്. ഇക്വിറ്റി, കോർപ്പറേറ്റ് ബോണ്ടുകൾ, സർക്കാർ കടപ്പത്രങ്ങൾ എന്നിവയിൽ നിക്ഷേപിക്കാൻ ഇതിലൂടെ സാധിക്കും. 60 വയസ്സിന് ശേഷം നിക്ഷേപത്തിന്റെ ഒരു നിശ്ചിത തുക ഒന്നിച്ച് പിൻവലിക്കാനും ബാക്കി തുക പ്രതിമാസ പെൻഷൻ നൽകുന്ന ആന്വിറ്റി പ്ലാനുകളിലേക്ക് മാറ്റാനും സാധിക്കും.
2. എംപ്ലോയീസ് പ്രൊവിഡന്റ് ഫണ്ട് (EPF)
സംഘടിത മേഖലയിലെ ശമ്പളക്കാരായ ജീവനക്കാർക്കായുള്ള ഏറ്റവും ജനപ്രിയ പദ്ധതി. ജീവനക്കാരനും തൊഴിലുടമയും അടിസ്ഥാന ശമ്പളത്തിന്റെ നിശ്ചിത ശതമാനം ഇതിലേക്ക് സംഭാവന ചെയ്യുന്നു. നിലവിൽ 8.25 ശതമാനമാണ് വാർഷിക പലിശ നിരക്ക്. ചികിത്സ, വീട് നിർമ്മാണം, വിദ്യാഭ്യാസം എന്നിവയ്ക്കായി നിബന്ധനകൾക്ക് വിധേയമായി വിരമിക്കുന്നതിന് മുൻപും ഭാഗികമായി തുക പിൻവലിക്കാം.
3. പബ്ലിക് പ്രൊവിഡന്റ് ഫണ്ട് (PPF)
കേന്ദ്ര സർക്കാരിന്റെ മികച്ച ലഘുസമ്പാദ്യ പദ്ധതികളിലൊന്നാണിത്. ഉയർന്ന നികുതി ഇളവാണ് ഇതിന്റെ പ്രധാന ആകർഷണം. നിലവിൽ 7.1 ശതമാനം പലിശ ലഭിക്കുന്ന ഈ പദ്ധതിയിൽ പ്രതിവർഷം 500 രൂപ മുതൽ 1.5 ലക്ഷം രൂപ വരെ നിക്ഷേപിക്കാം. 15 വർഷമാണ് കാലാവധിയെങ്കിലും ഫോം 16-H നൽകി അഞ്ച് വർഷം വീതം കാലാവധി നീട്ടിയെടുക്കാം. ഇതിൽ ജോയിന്റ് അക്കൗണ്ട് സാധ്യമല്ല.
4. സിസ്റ്റമാറ്റിക് പിൻവലിക്കൽ പ്ലാൻ (SWP)
മ്യൂച്വൽ ഫണ്ട് നിക്ഷേപങ്ങളിൽ നിന്നും കൃത്യമായ ഇടവേളകളിൽ നിശ്ചിത തുക പിൻവലിക്കാൻ സഹായിക്കുന്ന ക്രമീകരണമാണിത്. വിരമിച്ചവർക്ക് സ്ഥിരമായ പണമൊഴുക്ക് ഇത് വാഗ്ദാനം ചെയ്യുന്നുണ്ടെങ്കിലും, ഇതിൽ നിന്നുള്ള റിട്ടേണുകൾ വിപണിയിലെ ചാഞ്ചാട്ടങ്ങൾക്ക് വിധേയമായിരിക്കും.
5. അടൽ പെൻഷൻ യോജന (APY)
അസംഘടിത മേഖലയിൽ ജോലി ചെയ്യുന്നവർക്ക് അനുയോജ്യമായ പെൻഷൻ പദ്ധതി. 18 മുതൽ 40 വയസ്സ് വരെയുള്ളവർക്ക് അക്കൗണ്ട് ആരംഭിക്കാം. 60 വയസ്സ് വരെ നൽകുന്ന ചെറിയ പ്രതിമാസ വിഹിതത്തിന്റെ അടിസ്ഥാനത്തിൽ 1,000 രൂപ മുതൽ 5,000 രൂപ വരെ നിശ്ചിത പ്രതിമാസ പെൻഷൻ ഉറപ്പുനൽകുന്നു. ഇതിലെ പെൻഷൻ തുക വിപണി ചലനങ്ങൾക്ക് വിധേയമല്ല.
6. ആന്വിറ്റി പ്ലാനുകൾ (Annuity Plans)
ലൈഫ് ഇൻഷുറൻസ് കമ്പനികൾ നൽകുന്ന ഈ പദ്ധതികൾ കൈവശമുള്ള വലിയൊരു തുകയെ ആജീവനാന്ത വരുമാനമാക്കി മാറ്റാൻ സഹായിക്കുന്നു. നിക്ഷേപം നടത്തുന്നതോടെ ഉടനടി പ്രതിമാസമോ ത്രൈമാസമോ വാർഷികമായോ വരുമാനം ലഭിച്ചുതുടങ്ങും. ഒരാൾ എത്ര കാലം ജീവിച്ചിരിക്കുന്നുവോ അത്രയും കാലം ഈ വരുമാനം ഉറപ്പായും ലഭിക്കും എന്നതാണ് ഇതിന്റെ പ്രത്യേകത.
7. പോസ്റ്റ് ഓഫീസ് മന്ത്ലി ഇൻകം സ്കീം (POMIS)
കേന്ദ്ര സർക്കാർ പിന്തുണയുള്ള സുരക്ഷിതമായ ലഘു സമ്പാദ്യ പദ്ധതിയാണിത്. 5 വർഷമാണ് കാലാവധി. നിലവിൽ 7.4 ശതമാനമാണ് പലിശ. ആയിരം രൂപ മുതൽ സിംഗിൾ അക്കൗണ്ടിൽ 9 ലക്ഷം രൂപ വരെയും ജോയിന്റ് അക്കൗണ്ടിൽ 15 ലക്ഷം രൂപ വരെയും നിക്ഷേപിക്കാം. പരമാവധി നിക്ഷേപമായ 15 ലക്ഷം രൂപ നിക്ഷേപിച്ചാൽ മാസം തോറും 9,250 രൂപ വരുമാനം സ്വന്തമാക്കാം. 10 വയസ്സിന് മുകളിലുള്ള കുട്ടികളുടെ പേരിലും അക്കൗണ്ട് തുടങ്ങാം.
8. സീനിയർ സിറ്റിസൺസ് സേവിങ്സ് സ്കീം (SCSS)
മുതിർന്ന പൗരന്മാർക്കായി പോസ്റ്റ് ഓഫീസ് നൽകുന്ന മികച്ച സുരക്ഷിത നിക്ഷേപം. 5 വർഷ കാലാവധിയുള്ള ഈ പദ്ധതിയിൽ കുറഞ്ഞത് 1,000 രൂപ മുതൽ പരമാവധി 30 ലക്ഷം രൂപ വരെ നിക്ഷേപിക്കാം. നിലവിലെ പലിശ നിരക്ക് 8.2 ശതമാനമാണ്. ഓരോ മൂന്ന് മാസത്തിലും പലിശ അക്കൗണ്ടിൽ എത്തും. കാലാവധിക്ക് ശേഷം 3 വർഷത്തേക്ക് കൂടി നീട്ടാനും സാധിക്കും. ഒരു വർഷത്തിന് മുൻപ് അക്കൗണ്ട് ക്ലോസ് ചെയ്താൽ പലിശ ലഭിക്കില്ല. തുടർന്നുള്ള വർഷങ്ങളിൽ നിബന്ധനകൾക്ക് വിധേയമായി ചെറിയ തുക കുറച്ചുകൊണ്ട് അക്കൗണ്ട് ക്ലോസ് ചെയ്യാം.
