Img credit - BW Distrupt
ബെംഗളൂരു: ഓൺലൈൻ ഡെലിവറി പ്ലാറ്റ്ഫോമായ സ്വിഗ്ഗിയുടെ ഇൻസ്റ്റാമാർട്ട് (Instamart) വഴി ഇനി എൽപിജി (LPG) സിലിണ്ടറുകളും അതിവേഗം വീട്ടിലെത്തും. നിത്യോപയോഗ സാധനങ്ങളും പലചരക്കും മിനിറ്റുകൾക്കകം ഡെലിവറി ചെയ്യുന്ന ഇൻസ്റ്റാമാർട്ട് സേവനത്തിലേക്ക് എൽപിജി സിലിണ്ടറുകൾ കൂടി ഉൾപ്പെടുത്താൻ സ്വിഗ്ഗി ഔദ്യോഗികമായി ഒരുങ്ങുകയാണ്. പ്രമുഖ എൽപിജി വിതരണക്കാരുമായി ചേർന്നാണ് ഈ പദ്ധതി നടപ്പിലാക്കുന്നത്.
ബുക്കിംഗ് പ്രക്രിയകൾ ലളിതമാക്കാനും ഉപഭോക്താക്കൾക്ക് കൂടുതൽ വേഗത്തിൽ സിലിണ്ടറുകൾ എത്തിക്കാനും ഈ പുതിയ പങ്കാളിത്തം സഹായിക്കും. നിലവിലെ സിലിണ്ടർ വിതരണ ശൃംഖലയെക്കാൾ വേഗത്തിൽ ആവശ്യക്കാരിലേക്ക് സിലിണ്ടർ എത്തിക്കുക എന്നതാണ് ഇൻസ്റ്റാമാർട്ട് ലക്ഷ്യമിടുന്നത്.
ഇൻസ്റ്റാമാർട്ട് വഴിയുള്ള സിലിണ്ടറുകളുടെ വില വിവരങ്ങളും ഡെലിവറി ചാർജുകളും കമ്പനി ഉടൻ തന്നെ ഔദ്യോഗികമായി പുറത്തുവിടും. ആദ്യഘട്ടത്തിൽ രാജ്യത്തെ പ്രമുഖ മെട്രോ നഗരങ്ങളിലായിരിക്കും ഈ സേവനം ലഭ്യമാകുക. പിന്നീട് കേരളമടക്കമുള്ള മറ്റ് സംസ്ഥാനങ്ങളിലെ പ്രമുഖ നഗരങ്ങളിലേക്കും പദ്ധതി വ്യാപിപ്പിക്കുമെന്നാണ് വിവരങ്ങൾ.
