നിവിൻ പോളിയും പ്രശസ്ത തമിഴ് താരം സൂരിയും ആദ്യമായി ഒന്നിക്കുന്ന ബിഗ് ബജറ്റ് റൊമാന്റിക് സൈക്കോളജിക്കൽ ത്രില്ലർ ‘ഏഴ് കടൽ ഏഴ് മല’ (Yezhu Kadal Yezhu Malai) റിലീസിനൊരുങ്ങുന്നു. സംവിധായകൻ റാമിന്റെ മേക്കിങ്ങിൽ വലിയ കാത്തിരിപ്പോടെയെത്തുന്ന ചിത്രം ഒക്ടോബർ 1-ന് ലോകമെമ്പാടുമുള്ള തിയേറ്ററുകളിൽ എത്തുമെന്ന് നിർമ്മാതാക്കൾ ഔദ്യോഗികമായി പ്രഖ്യാപിച്ചു. പുതിയ ടീസർ പങ്കുവെച്ചുകൊണ്ടാണ് റിലീസ് തീയതി പുറത്തുവിട്ടത്.
നേരത്തെ 2024-ലെ റോട്ടർഡാം അന്താരാഷ്ട്ര ചലച്ചിത്രമേളയിൽ (IFFR) പ്രദർശിപ്പിച്ച് മികച്ച നിരൂപക പ്രശംസ നേടിയിരുന്ന ചിത്രം റിലീസിന് മുന്നേ തന്നെ സിനിമാപ്രേമികൾക്കിടയിൽ വലിയ പ്രതീക്ഷ ഉയർത്തിയിരുന്നു.
സാധാരണ പ്രണയ ചിത്രങ്ങളിൽ നിന്ന് തികച്ചും വ്യത്യസ്തമായി, 8,000-ത്തിലധികം വർഷങ്ങളായി ജീവിക്കുന്ന ഒരു അമരനായ മനുഷ്യന്റെ കഥയും നഷ്ടപ്പെട്ട പ്രണയം തേടിയുള്ള അയാളുടെ യാത്രയുമാണ് സിനിമ പറയുന്നത്. ഒരു ട്രെയിൻ യാത്രയിൽ ഇയാളുടെ ജീവിതത്തിലേക്ക് കടന്നുവരുന്ന സാധാരണക്കാരനായ യുവാവും, ഭൂതകാലത്തിലെ പ്രണയിനിയെ ഓർമ്മിപ്പിക്കുന്ന ദുരൂഹത നിറഞ്ഞ ഒരു സ്ത്രീയും കഥയെ വേറൊരു തലത്തിലേക്ക് എത്തിക്കുന്നു.
നിവിൻ പോളിക്കും സൂരിക്കും പുറമെ പ്രശസ്ത നടി അഞ്ജലിയാണ് ചിത്രത്തിൽ മറ്റൊരു പ്രധാന വേഷത്തിലെത്തുന്നത്. യുവൻ ശങ്കർ രാജ സംഗീതസംവിധാനം നിർവ്വഹിക്കുന്ന ചിത്രത്തിന് എൻ. കെ. ഏകാംബരം ഛായാഗ്രഹണവും മതി വി.എസ്. എഡിറ്റിംഗും നിർവ്വഹിക്കുന്നു. വർത്തമാനകാലവും ഭൂതകാലവും ഇടകലർത്തിയുള്ള റാമിന്റെ വേറിട്ട അവതരണശൈലി ഈ വർഷത്തെ ഏറ്റവും വലിയ സിനിമാ വിരുന്നുകളിൽ ഒന്നായിരിക്കുമെന്നാണ് വിലയിരുത്തൽ.
