പിറന്നാൾ ആശംസ നേർന്ന കൂട്ടുകാരന് നടൻ ബിനീഷ് ബാസ്റ്റിൻ നൽകിയ പരസ്യ മറുപടി സോഷ്യൽ മീഡിയയിൽ വൈറലായതിന് പിന്നാലെ രൂക്ഷമായ പ്രതികരണവുമായി അനസ് പാണാവള്ളി രംഗത്തെത്തി. തനിക്കും കുടുംബത്തിനും എന്തെങ്കിലും സംഭവിച്ചാൽ അതിന്റെ പൂർണ്ണ ഉത്തരവാദി ബിനീഷ് ബാസ്റ്റിൻ മാത്രമായിരിക്കുമെന്നാണ് അനസ് വ്യക്തമാക്കിയത്. താൻ ലക്ഷക്കണക്കിന് രൂപ കൊടുക്കാനുണ്ടെന്ന ധ്വനി ഉണ്ടാക്കുന്ന രീതിയിലാണ് ബിനീഷിന്റെ കുറിപ്പെന്നും, ബിനീഷിന് നൽകാനുണ്ടായിരുന്ന ബാക്കി തുക തിരികെ നൽകിയെന്നും സ്ക്രീൻഷോട്ട് സഹിതം അനസ് ഫേസ്ബുക്കിൽ കുറിച്ചു.
ബിനീഷിന്റെ കയ്യിൽ നിന്ന് 30,000 രൂപയാണ് കടം വാങ്ങിയിരുന്നതെന്നും ഇതിൽ 25,000 രൂപ നേരത്തെ തന്നെ തിരികെ നൽകിയിരുന്നുവെന്നും അനസ് വ്യക്തമാക്കുന്നു. ബാക്കിയുള്ള 5,000 രൂപ തിരികെ നൽകാൻ അല്പം സാവകാശം ചോദിച്ചപ്പോൾ, തന്റെ ഏക ഉപജീവന മാർഗ്ഗമായ ഓട്ടോറിക്ഷ വീട്ടിൽ കൊണ്ടുവന്നിടാനാണ് ബിനീഷ് ആവശ്യപ്പെട്ടത്. വെറും അയ്യായിരം രൂപയുടെ പേരിൽ തന്നെയയും കുടുംബത്തെയും സോഷ്യൽ മീഡിയയിൽ പരസ്യമായി അപമാനിച്ചതോടെ മക്കൾക്ക് പോലും പുറത്തിറങ്ങാൻ പറ്റാത്ത സാഹചര്യമാണെന്നും അനസ് കൂട്ടിച്ചേർത്തു.
മറ്റുള്ളവർക്ക് വേണ്ടി ജീവകാരുണ്യ പ്രവർത്തനങ്ങൾ നടത്തുന്നതിനായി വിവിധ ആളുകളിൽ നിന്ന് 6 ലക്ഷത്തോളം രൂപ താൻ കടം വാങ്ങിയിട്ടുണ്ടെന്നും അതെല്ലാം കൃത്യമായി തിരികെ നൽകുമെന്നും അനസ് പറഞ്ഞു. 9 വർഷമായി ചാരിറ്റി രംഗത്ത് പ്രവർത്തിക്കുന്ന തനിക്ക് രണ്ട് പെൺമക്കളും ഭാര്യയുമുണ്ട്. ബിനീഷിനെ സ്വന്തം സഹോദരനായാണ് കണ്ടിരുന്നതെന്നും, വെറും 5,000 രൂപയ്ക്ക് വേണ്ടി ഒരു മനുഷ്യനെ ഇത്തരത്തിൽ താറടിച്ച് കാണിക്കരുതായിരുന്നുവെന്നും അനസ് ദുഃഖത്തോടെ പ്രതികരിച്ചു.
നേരത്തെ, അനസ് ആശംസ നേർന്ന ഫേസ്ബുക്ക് പോസ്റ്റിന് താഴെ അദ്ദേഹത്തിന്റെ ചിത്രം പങ്കുവെച്ചുകൊണ്ടായിരുന്നു ബിനീഷിന്റെ വിവാദ പ്രതികരണം. ഓട്ടോയുടെ ഇൻഷുറൻസും ടെസ്റ്റും മുടങ്ങിയെന്ന് പറഞ്ഞ് വലിയ തുക കടം വാങ്ങിയെന്നും ചോദിച്ചപ്പോൾ ‘വാങ്ങിക്കാൻ പറ്റുമെങ്കിൽ വാങ്ങിക്കോ’ എന്ന മറുപടിയാണ് ലഭിച്ചതെന്നും ബിനീഷ് ആരോപിച്ചിരുന്നു. സ്വന്തം കല്യാണ ആവശ്യത്തിന് വേണ്ടി പലതവണ പണം തിരികെ ചോദിക്കേണ്ടി വന്നുവെന്നും, നുണ പറഞ്ഞ് പണം വാങ്ങിയതിനാലാണ് സൗഹൃദം അവസാനിപ്പിക്കുന്നതെന്നും ബിനീഷ് വ്യക്തമാക്കിയിരുന്നു. ഇതിന് പിന്നാലെയാണ് മുഴുവൻ സാമ്പത്തിക ഇടപാടുകളും തീർത്ത് അനസ് രംഗത്തെത്തിയത്.
