‘പ്രേമം’ എന്ന ഒറ്റ ചിത്രത്തിലൂടെ മലയാളി പ്രേക്ഷകരുടെ മനസ്സ് കവർന്ന്, പിന്നീട് മറ്റ് ഭാഷകളിലും തന്റേതായ ഇടം കണ്ടെത്തിയ താരമാണ് അനുപമ പരമേശ്വരൻ. കഴിഞ്ഞ കുറച്ച് ദിവസങ്ങളായി അനുപമയുടെ ഇൻസ്റ്റഗ്രാം പോസ്റ്റുകളെ മുൻനിർത്തി, താരം നടൻ ധ്രുവ് വിക്രമുമായി പ്രണയത്തിലായിരുന്നുവെന്നും ആ പ്രണയം തകർന്നു എന്നുമുള്ള തരത്തിൽ നിരവധി ഗോസിപ്പുകൾ പ്രചരിച്ചിരുന്നു. എന്നാൽ ഇത്തരം പ്രചരണങ്ങളിൽ മൗനം വെടിഞ്ഞ് കടുത്ത ഭാഷയിൽ പ്രതികരിച്ചിരിക്കുകയാണ് താരം.
തന്റെ പുതിയ ചിത്രമായ ‘ക്രേസി കല്യാണം’ എന്ന സിനിമയുടെ ടീസർ ലോഞ്ചിൽ മാധ്യമപ്രവർത്തകരുടെ ചോദ്യത്തിന് മറുപടി നൽകവെയാണ് അനുപമ അമർഷം പരസ്യമാക്കിയത്.
“എന്റെ ഇൻസ്റ്റഗ്രാം, അത് എന്റെ തീരുമാനമാണ്. അക്കൗണ്ടിൽ എന്ത് പോസ്റ്റ് ചെയ്യണമെന്ന് തീരുമാനിക്കുന്നത് ഞാനാണ്. ആ പോസ്റ്റുകൾ ആരെയും ലക്ഷ്യം വെച്ചുള്ളതല്ല, വ്യക്തിപരമായ ചിന്തകൾ മാത്രമാണ്. എന്റെ ജീവിതത്തെക്കുറിച്ച് നിങ്ങൾക്ക് എന്തറിയാം? ഒരാളുടെ സോഷ്യൽ മീഡിയയിലെ പോസ്റ്റുകൾ കണ്ട് അയാളെ വിലയിരുത്തരുത്,” അനുപമ രൂക്ഷമായ ഭാഷയിൽ പ്രതികരിച്ചു.
ജീവിതത്തിൽ താൻ നേരിട്ട പ്രണയം, വേർപാട്, ആരോഗ്യപ്രശ്നങ്ങൾ എന്നിവയെക്കുറിച്ചും പല പ്രതിസന്ധികളും ഒറ്റയ്ക്ക് നേരിടേണ്ടി വന്നതിനെക്കുറിച്ചും താരം മുൻപ് ഇൻസ്റ്റഗ്രാമിലൂടെ തുറന്നുപറഞ്ഞിരുന്നു. ഈ പോസ്റ്റുകളെ ദുർവ്യാഖ്യാനം ചെയ്താണ് പാപ്പരാസികൾ നടൻ ധ്രുവ് വിക്രമുമായി ചേർത്തുവെച്ച് ഗോസിപ്പുകൾ മെനഞ്ഞത്. ഇതിനെയെല്ലാം തള്ളിക്കളയുന്നതായിരുന്നു ടീസർ ലോഞ്ചിലെ താരത്തിന്റെ മറുപടി.
‘ക്രേസി കല്യാണം’, ‘ഡ്രാഗൺ’, ‘ബൈസൺ കാളമാടൻ’ തുടങ്ങി നിരവധിയായ വൻകിട പ്രോജക്റ്റുകളാണ് അനുപമയുടേതായി അണിയറയിൽ ഒരുങ്ങുന്നത്.
