ന്യൂഡൽഹി: ഭർത്താവിനെ മറ്റൊരു യുവതിയുടെ ഫ്ലാറ്റിൽ കണ്ടതിനെത്തുടർന്ന് ഗ്രേറ്റർ നോയിഡയിലെ ഗൗർ സിറ്റി-2 ടൗൺഷിപ്പിൽ ഭാര്യയും ഭർത്താവിന്റെ സുഹൃത്തും തമ്മിൽ അതിരൂക്ഷമായ തർക്കവും കൈയാങ്കളിയും. സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ വൈറലായിട്ടുണ്ട്.
നോയിഡയിൽ താമസിക്കുന്ന ദമ്പതികൾ നിലവിൽ പിരിഞ്ഞുതാമസിക്കുകയാണ്. ഇവരുടെ വിവാഹമോചനക്കേസ് കോടതിയുടെ പരിഗണനയിലാണ്. കഴിഞ്ഞ വെള്ളിയാഴ്ച കേസിനായി ഇരുവരും കോടതിയിൽ ഹാജരാകേണ്ടതായിരുന്നു. എന്നാൽ യുവാവ് ഹാജരായില്ല.
ഇതോടെ ഭർത്താവിനെ തിരഞ്ഞിറങ്ങിയ ഭാര്യ, അപ്പാർട്ട്മെന്റ് സമുച്ചയത്തിലെ തന്നെ മറ്റൊരു യുവതിയുടെ ഫ്ലാറ്റിൽ ഇയാളെ കണ്ടെത്തുകയായിരുന്നു. തുടർന്ന് ഭാര്യയും ഭർത്താവിന്റെ സുഹൃത്തായ യുവതിയും തമ്മിൽ രൂക്ഷമായ തർക്കവും അടിപിടിയുമുണ്ടായി. ബഹളം കേട്ട് അയൽക്കാരും ഫ്ലാറ്റിലെ മറ്റ് താമസക്കാരും സ്ഥലത്ത് തടിച്ചുകൂടി.
സംഭവത്തിന് പിന്നാലെ രണ്ട് യുവതികളും പൊലീസിനെ സമീപിച്ചു. എന്നാൽ ആരും രേഖാമൂലം പരാതി നൽകിയിട്ടില്ലെന്ന് പൊലീസ് അറിയിച്ചു.
യുവതി ഫ്ലാറ്റ് ഒഴിഞ്ഞ് പോവുകയായിരുന്നുവെന്നും സാധനങ്ങൾ മാറ്റിസ്ഥാപിക്കാൻ സഹായിക്കാനാണ് യുവാവ് എത്തിയതെന്നുമാണ് പൊലീസിന് നൽകിയ മൊഴി. രേഖാമൂലമുള്ള പരാതി ലഭിക്കാത്തതിനാൽ നിലവിൽ കേസെടുത്തിട്ടില്ലെന്ന് പൊലീസ് വ്യക്തമാക്കി.
