ന്യൂഡൽഹി: ടെലികോം മേഖലയിൽ വൻ തിരിച്ചുവരവ് ലക്ഷ്യമിട്ട് ഭാരത് സഞ്ചാർ നിഗം ലിമിറ്റഡ് (BSNL). അടുത്ത അഞ്ച് വർഷത്തിനുള്ളിൽ 77,000 കോടി രൂപയുടെ മൂലധന നിക്ഷേപം നടത്താനാണ് കമ്പനി ബോർഡ് തീരുമാനിച്ചിരിക്കുന്നത്. രാജ്യത്തെ രണ്ടു ലക്ഷത്തോളം കേന്ദ്രങ്ങളിൽ 4ജി ശൃംഖല വ്യാപിപ്പിക്കാനും, തിരക്കേറിയ പ്രദേശങ്ങളിൽ 5ജി സർവീസ് ലഭ്യമാക്കാനുമാണ് ഈ തുക പ്രധാനമായും വിനിയോഗിക്കുക.
അടുത്ത അഞ്ച് വർഷത്തിനുള്ളിൽ രാജ്യത്തെ 98 ശതമാനം പ്രദേശങ്ങളിലും 5ജി സേവനങ്ങൾ എത്തിക്കാനാണ് കമ്പനി ലക്ഷ്യമിടുന്നത്. ഈ കൂറ്റൻ നിക്ഷേപത്തിലൂടെ 2029-ഓടെ കമ്പനിയെ ലാഭവും നഷ്ടവുമില്ലാത്ത (Break-even) അവസ്ഥയിലേക്ക് എത്തിക്കാൻ സാധിക്കുമെന്നാണ് ബിഎസ്എൻഎൽ വിലയിരുത്തുന്നത്.
നിലവിലെ സാമ്പത്തിക വർഷത്തിന്റെ ഒന്നാം പാദത്തിൽ 1,280 കോടി രൂപയുടെ നഷ്ടമാണ് ബിഎസ്എൻഎൽ നേരിട്ടത്. മുൻവർഷത്തെ അപേക്ഷിച്ച് നഷ്ടത്തിൽ വർധനവുണ്ടായിട്ടുണ്ട്. റിലയൻസ് ജിയോ, ഭാരതി എയർടെൽ തുടങ്ങിയ സ്വകാര്യ ടെലികോം കമ്പനികളിൽ നിന്നുള്ള കടുത്ത മത്സരം കാരണം പ്രതിസന്ധിയിലായ ഘട്ടത്തിലാണ് സർവീസുകൾ കൂടുതൽ കാര്യക്ഷമമാക്കാനും സാങ്കേതികവിദ്യ നവീകരിക്കാനുമായി പൊതുമേഖലാ സ്ഥാപനമായ ബിഎസ്എൻഎൽ ഈ വൻ പദ്ധതി പ്രഖ്യാപിച്ചിരിക്കുന്നത്.
#BSNL #BSNL4G #BSNL5G #TelecomNews #Investment #BusinessNews #NationalNews #India
