നടി അനുപമ പരമേശ്വരന്റെ മുൻകാല ബന്ധത്തെക്കുറിച്ചുള്ള വെളിപ്പെടുത്തലുകൾക്ക് പിന്നാലെ ഉയർന്ന അഭ്യൂഹങ്ങളിലും ചർച്ചകളിലും പ്രതികരണവുമായി നടൻ ധ്രുവ് വിക്രം. മാധ്യമശ്രദ്ധയും സ്വകാര്യജീവിതത്തെക്കുറിച്ചുള്ള ഊഹാപോഹങ്ങളും തന്നെ ബാധിക്കാറുണ്ടെന്ന് വ്യക്തമാക്കിയ ധ്രുവ്, ഇത്തരം കാര്യങ്ങളിൽ സ്വന്തം മൂല്യങ്ങൾക്കാണ് പ്രാധാന്യം നൽകേണ്ടതെന്നും കൂട്ടിച്ചേർത്തു.
“യാഥാർഥ്യത്തിൽ ഉറച്ചുനിൽക്കണം. നിങ്ങൾ ആരാണെന്നും എന്തിനുവേണ്ടിയാണ് നിലകൊള്ളുന്നതെന്നും അറിയണം. നിങ്ങൾ സ്നേഹിക്കുന്നവരെയും നിങ്ങൾക്ക് പ്രധാനപ്പെട്ട കാര്യങ്ങളെയും സംരക്ഷിക്കണം. നിങ്ങൾക്ക് നിങ്ങളുടെ സ്വന്തം ലോകമുണ്ട്, കഴിയുന്നത്ര നിങ്ങളുടെ സ്വകാര്യ ഇടം സംരക്ഷിക്കുക,” എന്ന് ധ്രുവ് വ്യക്തമാക്കി.
തന്റെ സോഷ്യൽ മീഡിയ സാന്നിധ്യത്തെക്കുറിച്ചും താരം സംസാരിച്ചു. ഇൻസ്റ്റഗ്രാമിൽ അത്ര സജീവമല്ലെങ്കിലും അച്ഛൻ വിക്രമിന്റെയും സഹോദരപുത്രിയുടെയും വളർത്തുമൃഗങ്ങളുടെയും വീഡിയോകൾ വ്യക്തിഗതമായി എഡിറ്റ് ചെയ്യാൻ ഇഷ്ടമാണെന്നും, എന്നാൽ അവയൊന്നും സോഷ്യൽ മീഡിയയിൽ പങ്കുവയ്ക്കാറില്ലെന്നും അദ്ദേഹം പറഞ്ഞു.
അടുത്തിടെ അനുപമ പരമേശ്വരൻ നൽകിയ അഭിമുഖത്തിൽ, തന്റെ മുൻകാല ബന്ധത്തിൽ കടുത്ത നിയന്ത്രണങ്ങളും മാനസിക സമ്മർദങ്ങളും നേരിടേണ്ടി വന്നിട്ടുണ്ടെന്ന് വെളിപ്പെടുത്തിയിരുന്നു. ആരുടെയും പേര് അനുപമ നേരിട്ട് പരാമർശിച്ചിരുന്നില്ലെങ്കിലും, സോഷ്യൽ മീഡിയയിൽ ഈ വാക്കുകൾ ധ്രുവ് വിക്രമുമായി ബന്ധപ്പെടുത്തി ചർച്ചകൾ ഉയരുകയായിരുന്നു. എന്നാൽ ഇരുവരും തമ്മിലുള്ള ബന്ധത്തെക്കുറിച്ചോ വേർപിരിയലിനെക്കുറിച്ചോ യാതൊരുവിധ ഔദ്യോഗിക സ്ഥിരീകരണവും ഇതുവരെ പുറത്തുവന്നിട്ടില്ല.
#DhruvVikram #AnupamaParameswaran #CinemaNews #Kollywood #MalayalamCinemaNews #SocialMediaTrends
