മലയാള സിനിമയിലെ യുവനിര ഒന്നിച്ച മൾട്ടിസ്റ്റാർ ചിത്രം ‘അതിരടി’ ബോക്സ് ഓഫീസിൽ കുതിപ്പ് തുടരുന്നു. ബേസിൽ ജോസഫ്, ടൊവിനോ തോമസ്, വിനീത് ശ്രീനിവാസൻ എന്നിവർ പ്രധാന വേഷങ്ങളിലെത്തിയ ചിത്രം മെയ് 14-നാണ് തിയേറ്ററുകളിൽ എത്തിയത്. ആദ്യ ദിനം മുതൽക്കേ മികച്ച പ്രേക്ഷക പ്രതികരണമാണ് ചിത്രത്തിന് ലഭിച്ചുകൊണ്ടിരിക്കുന്നത്.
ആഗോള ബോക്സ് ഓഫീസിൽ ഇതുവരെ 10.54 കോടി രൂപ ചിത്രം നേടിക്കഴിഞ്ഞു. ഇതിൽ ഇന്ത്യൻ മാർക്കറ്റിൽ നിന്ന് മാത്രം 7.04 കോടിയും, വിദേശ വിപണിയിൽ നിന്ന് 3.50 കോടിയുമാണ് ചിത്രം സമാഹരിച്ചത്. റിലീസിന് മുന്നോടിയായി മെയ് 13-ന് നടത്തിയ പെയ്ഡ് പ്രീമിയറുകൾക്കും വലിയ സ്വീകാര്യതയാണ് ലഭിച്ചത്.
നവാഗതനായ അരുൺ അനിരുദ്ധൻ സംവിധാനം ചെയ്ത ചിത്രം ഒരു കംപ്ലീറ്റ് മാസ്സ് കോമഡി ക്യാമ്പസ് ആക്ഷൻ എന്റർടെയ്നറാണ്. ബേസിൽ ജോസഫ് എന്റർടൈൻമെന്റ്സും, ഡോ. അനന്തു എസ് (ഡോ. അനന്തു എന്റർടൈൻമെന്റ്സ്) ഉം ചേർന്നാണ് ചിത്രം നിർമ്മിച്ചിരിക്കുന്നത്. സമീർ താഹിറും ടൊവിനോ തോമസുമാണ് ചിത്രത്തിന്റെ കോ-പ്രൊഡ്യൂസർമാർ.
‘മിന്നൽ മുരളി’ക്ക് ശേഷം ബേസിൽ ജോസഫും ടൊവിനോ തോമസും വീണ്ടും ഒന്നിക്കുന്നു എന്നതും ബേസിൽ ജോസഫിന്റെ ആദ്യ നിർമ്മാണ സംരംഭം എന്നതും സിനിമയുടെ ഹൈലൈറ്റുകളാണ്. ഇതിനകം സോഷ്യൽ മീഡിയയിൽ വൈറലായ ടൈറ്റിൽ ടീസറും ട്രെയിലറും വലിയ പ്രതീക്ഷകൾ നൽകിയിരുന്നു. താരങ്ങളുടെ മേക്ക് ഓവറും പ്രകടനവുമാണ് ചിത്രത്തെ വിജയത്തിലേക്ക് നയിക്കുന്ന പ്രധാന ഘടകങ്ങൾ.
