മുംബൈ: പശ്ചിമേഷ്യൻ യുദ്ധത്തെത്തുടർന്നുണ്ടായ സാമ്പത്തിക പ്രതിസന്ധിയും പണപ്പെരുപ്പവും വിപണിയെ ബാധിച്ചതോടെ പ്രമുഖ എഫ്.എം.സി.ജി (FMCG) കമ്പനിയായ കോൾഗേറ്റ്-പാമോലീവ് ഇന്ത്യ ഉൽപ്പന്നങ്ങളുടെ വില വീണ്ടും വർധിപ്പിക്കാനൊരുങ്ങുന്നു. വരുന്ന മാസങ്ങളിൽ വില വർധനവുണ്ടാകുമെന്ന സൂചനയാണ് കമ്പനി നൽകിയിരിക്കുന്നത്.
പണപ്പെരുപ്പം കാരണം ലാഭവിഹിതത്തിലുണ്ടാകുന്ന ഇടിവ് മറികടക്കാനാണ് ഈ നീക്കമെന്ന് കമ്പനി വ്യക്തമാക്കി. എന്നാൽ, 10 രൂപ, 20 രൂപ നിരക്കുകളിലുള്ള ചെറിയ പാക്കറ്റുകളുടെ അളവിലോ വിലയിലോ മാറ്റം വരുത്തിയിട്ടില്ലെന്നും സാധാരണക്കാരായ ഉപഭോക്താക്കൾക്ക് ഇത് ആശ്വാസകരമായി തുടരുമെന്നും കമ്പനി സി.ഇ.ഒയും മാനേജിങ് ഡയറക്ടറുമായ പ്രഭ നരസിംഹൻ ഇൻവെസ്റ്റർ ഡേ കോളിൽ അറിയിച്ചു.
ജി.എസ്.ടി കുറച്ചതിന്റെ ആനുകൂല്യം പാവപ്പെട്ട ഉപഭോക്താക്കളിൽ എത്തിക്കാൻ ചെറിയ പാക്കറ്റുകളിൽ ഉൽപ്പന്നത്തിന്റെ അളവ് കൂട്ടി നൽകിയിരുന്നു. ഇത് ഇപ്പോഴും തുടരുന്നുണ്ടെന്നും അവർ വ്യക്തമാക്കി.
ഹിന്ദുസ്ഥാൻ യൂണിലിവറിന്റെ പെപ്സോഡെന്റ്, ക്ലോസപ്പ്, സെൻസോഡൈൻ, പതഞ്ജലി തുടങ്ങിയ ജനപ്രിയ ബ്രാൻഡുകളോട് മത്സരിക്കുന്ന കോൾഗേറ്റ്, വിൽപ്പന ഉയർത്താൻ ‘പ്രീമിയമൈസേഷൻ’ തന്ത്രങ്ങൾ ഇരട്ടിയാക്കാനാണ് പദ്ധതിയിടുന്നത്. ഗ്രാമീണ മേഖലകളിൽ വായയുടെ ശുചിത്വത്തെക്കുറിച്ചുള്ള അവബോധം ഉയർന്നതും ഉൽപ്പന്നങ്ങളുടെ ലഭ്യത വർധിച്ചതും വിൽപ്പന കൂട്ടാൻ സഹായിക്കുന്നുണ്ടെന്നും പ്രഭ നരസിംഹൻ കൂട്ടിചേർത്തു.
#ColgatePalmolive #PriceHike #PriceRise #Inflation #BusinessNews #FMCG #IndiaNews #MalayalamNews
