ദുബായ്: മലയാളികളുടെ പ്രിയപ്പെട്ട അവതാരകയും വ്ലോഗറുമായ പേളി മാണിക്കും ഭർത്താവ് ശ്രീനിഷ് അരവിന്ദിനും ഇനി ദുബായിലും സ്വന്തം മേൽവിലാസം. ദുബായ് സൗത്തിൽ ഇരുവരും ചേർന്ന് പുതിയ ആഡംബര അപ്പാർട്ട്മെന്റ് സ്വന്തമാക്കി. തങ്ങളുടെ ഔദ്യോഗിക യൂട്യൂബ് ചാനലിലൂടെ പങ്കുവെച്ച പുതിയ വീഡിയോയിലാണ് താരങ്ങൾ ഈ സന്തോഷവാർത്ത ആരാധകരെ അറിയിച്ചത്.
ആഡംബര സൗകര്യങ്ങളോടെ പുതിയ വീട്
വീഡിയോയിൽ പറയുന്നതനുസരിച്ച്, ഏകദേശം 12.3 ലക്ഷം ദിർഹം (ഇന്ത്യൻ കണക്കിൽ ഏകദേശം മൂന്ന് കോടി രൂപ) വിലമതിക്കുന്ന രണ്ട് കിടപ്പുമുറികളും അടുക്കളയും ബാൽക്കണിയുമുള്ള (2 BHK) ഫ്ലാറ്റാണ് ഇരുവരും വാങ്ങിയത്.
അൽ മക്തും അന്താരാഷ്ട്ര വിമാനത്താവളം, ജബൽ അലി തുറമുഖം, ലുലു ഹൈപ്പർമാർക്കറ്റ്, എക്സ്പോ സിറ്റി എന്നിവയ്ക്ക് തൊട്ടടുത്താണ് ഈ അപ്പാർട്ട്മെന്റ് സമുച്ചയം സ്ഥിതി ചെയ്യുന്നത്. ബേസ്മെന്റും ഗ്രൗണ്ട് ഫ്ലോറും കൂടാതെ ആറ് നിലകളുള്ള കെട്ടിടത്തിലാണ് ഇവരുടെ ഫ്ലാറ്റ് ഒരുങ്ങുന്നത്. അപ്പാർട്ട്മെന്റിന്റെ നിർമ്മാണം നടക്കുന്ന സ്ഥലം പേളിയും ശ്രീനിഷും സന്ദർശിക്കുന്നതും വീഡിയോയിലുണ്ട്.
ബിഗ് ബോസ് പ്രണയം മുതൽ ദുബായ് അപ്പാർട്ട്മെന്റ് വരെ
മലയാളം ‘ബിഗ് ബോസ്’ റിയാലിറ്റി ഷോയുടെ ആദ്യ സീസണിലൂടെയാണ് പേളിയും ശ്രീനിഷും പ്രണയത്തിലാകുന്നത്. ഷോയ്ക്ക് പുറത്തിറങ്ങിയ ശേഷം ഇരു കുടുംബങ്ങളുടെയും സമ്മതത്തോടെ വിവാഹിതരായ ഇവർ ഇന്ന് സോഷ്യൽ മീഡിയയിലെ ഏറ്റവും ജനപ്രിയ ദമ്പതിമാരാണ്.
നില, നിതാര എന്നീ രണ്ട് പെൺമക്കളുടെ മാതാപിതാക്കളായ പേളിയും ശ്രീനിയും തങ്ങളുടെ കുടുംബവിശേഷങ്ങൾ നിരന്തരം ആരാധകരുമായി പങ്കുവെക്കാറുണ്ട്. വിവാഹശേഷവും കരിയറും കുടുംബജീവിതവും ഒരുപോലെ മനോഹരമായി മുന്നോട്ട് കൊണ്ടുപോകുന്ന പേളി, ഒരു അമ്മയായും ഭാര്യയായും താൻ ജീവിതത്തിൽ എത്രത്തോളം സന്തുഷ്ടയാണെന്ന് പലപ്പോഴും വ്ലോഗുകളിലൂടെ വ്യക്തമാക്കാറുണ്ട്. പ്രിയതാരങ്ങളുടെ പുതിയ നേട്ടത്തിൽ ആശംസകളുമായി എത്തിയിരിക്കുകയാണ് ആരാധകർ.
