കുറ്റിപ്പുറം: മലപ്പുറം കുറ്റിപ്പുറത്തുള്ള പ്രശസ്തമായ ‘ചോറും മീനും’ ഹോട്ടലിലുണ്ടായ കൂട്ടയടിയിൽ അഞ്ച് പേർക്കെതിരെ പോലീസ് കേസെടുത്തു. വൈരംകോട് സ്വദേശികളായ അഞ്ചുപേർക്കെതിരെയാണ് കുറ്റിപ്പുറം പോലീസ് കേസെടുത്തിരിക്കുന്നത്.
ഉച്ചയ്ക്ക് 2:30-ഓടെയാണ് സംഭവം. ഭക്ഷണം കഴിക്കുന്നതിനിടെ മീനിന്റെ തുകയെ ചൊല്ലി ഉപഭോക്താക്കളും ജീവനക്കാരും തമ്മിൽ തർക്കമുണ്ടാവുകയും ഇത് പിന്നീട് വലിയ കൈയേറ്റത്തിൽ കലാശിക്കുകയുമായിരുന്നു.
തർക്കം തടയാൻ ചെന്ന ഹോട്ടൽ ജീവനക്കാരെ പ്രതികൾ ക്രൂരമായി മർദിച്ചുവെന്നാണ് പരാതി. അക്രമത്തിൽ ജീവനക്കാരുടെ ചുണ്ടിനും താടിയെല്ലിനും കണ്ണിനും പരിക്കേറ്റിട്ടുണ്ട്.
പരിക്കേറ്റ ജീവനക്കാരുടെ പരാതിയിലാണ് പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചത്. പ്രതികൾ ഇതിനുമുമ്പും ഹോട്ടലിൽ എത്തി സമാനമായ രീതിയിൽ പ്രശ്നങ്ങൾ ഉണ്ടാക്കിയിട്ടുണ്ടെന്ന് ഹോട്ടലുടമ വ്യക്തമാക്കി.
