വേനൽക്കാലത്തിന്റെ കടുത്ത ചൂടിൽ നിന്ന് ആശ്വാസം തേടി സൗദി അറേബ്യയിലെ അൽ ബാഹ പ്രവിശ്യയിലേക്ക് വിനോദസഞ്ചാരികളുടെ വൻ തിരക്ക്. മിതമായ കാലാവസ്ഥയും മനോഹരമായ പ്രകൃതിഭംഗിയുമാണ് രാജ്യത്തിന്റെ വിവിധ ഭാഗങ്ങളിൽ നിന്നുള്ള സന്ദർശകരെ അൽ ബാഹയിലേക്ക് ആകർഷിക്കുന്നത്.
പ്രദേശത്തെ പ്രകൃതിദത്ത വിനോദസഞ്ചാര കേന്ദ്രങ്ങൾ, വിശാലമായ പാർക്കുകൾ, പൂന്തോട്ടങ്ങൾ എന്നിവ കേന്ദ്രീകരിച്ച് വലിയ ജനത്തിരക്കാണ് അനുഭവപ്പെടുന്നത്. പ്രത്യേകിച്ച് വൈകുന്നേരങ്ങളിൽ കുടുംബസമേതം നിരവധി പേരാണ് ഇവിടെ എത്തിച്ചേരുന്നത്.
അൽ ബാഹയിലെ ഹരിതാഭ നിറഞ്ഞ വനങ്ങൾ, ആകർഷകമായ പർവതനിരകൾ, പച്ചപ്പ് നിറഞ്ഞ താഴ്വരകൾ, പരമ്പരാഗത പൈതൃക ഗ്രാമങ്ങൾ എന്നിവ സഞ്ചാരികളെ ഏറെ ആകർഷിക്കുന്നു. കടുത്ത വേനലിലും അനുഭവപ്പെടുന്ന മിതമായ താപനിലയും പർവതനിരകളിൽ രൂപപ്പെടുന്ന മൂടൽമഞ്ഞുമാണ് യാത്രക്കാരെ ഇവിടേക്ക് കൂടുതലായി എത്തിക്കുന്നത്.
പ്രദേശത്തെ സന്ദർശക പ്രവാഹത്തിന്റെ ദൃശ്യങ്ങൾ സൗദി പ്രസ് ഏജൻസിയും (SPA) പുറത്തുവിട്ടിട്ടുണ്ട്.
