അഭിമുഖങ്ങളിലെ കൗണ്ടറുകളിലൂടെയും ട്രോളുകളിലൂടെയും മലയാളികളെ പൊട്ടിച്ചിരിപ്പിക്കുന്ന നടൻ ധ്യാൻ ശ്രീനിവാസന്റെ ‘ഡെഡ്പാൻ ഹ്യൂമർ’ ഒടുവിൽ പാൻ ഇന്ത്യൻ തലത്തിൽ വലിയൊരു വിവാദത്തിന് തിരികൊളുത്തിയിരിക്കുകയാണ്. തമിഴകത്തെ സൂപ്പർ താരം വിജയ് മുഖ്യമന്ത്രിയായി സത്യപ്രതിജ്ഞ ചെയ്ത ചടങ്ങിനെക്കുറിച്ച് ധ്യാൻ കേരളത്തിൽ നടത്തിയ തമാശ പരാമർശമാണ് ഇപ്പോൾ തമിഴ്നാട്ടിലെ സോഷ്യൽ മീഡിയ ഏറ്റെടുത്തിരിക്കുന്നതും വലിയ തോതിലുള്ള തർക്കങ്ങൾക്ക് കാരണമായിരിക്കുന്നതും.
തമിഴ്നാട് മുഖ്യമന്ത്രിയായി വിജയ് സത്യപ്രതിജ്ഞ ചെയ്തപ്പോൾ പ്രശസ്ത നടി തൃഷ ചടങ്ങിൽ പങ്കെടുത്തതിനെ പരാമർശിച്ചായിരുന്നു ധ്യാനിന്റെ പഴയ പ്രതികരണം. ഭാവിയിൽ താൻ മുഖ്യമന്ത്രിയായി സത്യപ്രതിജ്ഞ ചെയ്യുമ്പോൾ നടി നവ്യ നായർ സാരിയൊക്കെ ഉടുത്ത് മുൻനിരയിൽ തന്നെ ഉണ്ടാവണം എന്നായിരുന്നു ധ്യാൻ തന്റെ പതിവ് ശൈലിയിൽ തമാശയായി പറഞ്ഞത്. കേരളത്തിൽ ഈ ട്രോൾ വലിയ രീതിയിൽ ആസ്വദിക്കപ്പെട്ടെങ്കിലും, ഇപ്പോഴാണ് തമിഴ് സോഷ്യൽ മീഡിയയിൽ ഈ വീഡിയോ എത്തിയത്.
ധ്യാനിന്റെ ഈ ഡെഡ്പാൻ തമാശയുടെ പശ്ചാത്തലം അറിയാത്ത വിജയ് ആരാധകരും തമിഴ് മക്കളും ഇതിനെ അതീവ ഗൗരവത്തോടെയാണ് എടുത്തിരിക്കുന്നത്. “ഇതിലും ഭേദം തൃഷയെ ചെരുപ്പൂരി അടിക്കുന്നതായിരുന്നു” (ഇത്ക്ക് തൃഷാവെ സെരുപ്പാല അടിച്ചിരിക്കലാം) എന്ന് തുടങ്ങി കടുത്ത ഭാഷയിലാണ് തമിഴ് പ്രൊഫൈലുകൾ ഇതിനോട് പ്രതികരിക്കുന്നത്.
വിജയ് ആരാധകരിൽ നിന്നും തമിഴ് സോഷ്യൽ മീഡിയയിൽ നിന്നും വലിയ രീതിയിലുള്ള വിമർശനവും തെറിവിളികളുമാണ് ധ്യാനിന് നേരെ ഉയരുന്നത്.
“ഇവന് എന്തൊരു ധൈര്യമാണ്! തമിഴ്നാടിനെയാണ് അവൻ അപമാനിച്ചത്. നമ്മുടെ അവസ്ഥ വളരെ ലജ്ജാകരമാണ്, കേരളത്തിലുള്ള ഒരു നടൻ വരെ നമ്മളെ ട്രോളുന്നു. ഇവൻ തമിഴ്നാട്ടിലേക്ക് വരാൻ കാത്തിരിക്കുകയാണ്. ഇവന്റെ ചേട്ടൻ (വിനീത് ശ്രീനിവാസൻ) ചെന്നൈയിലാണ് താമസമെന്നത് ഓർക്കണം.” – തമിഴ് പേജുകളിലെ കമന്റുകൾ പറയുന്നു.
വിഷയം തമിഴ്നാട്ടിൽ കത്തിയതോടെ മലയാളികളും കമന്റ് ബോക്സുകളിൽ സജീവമായിട്ടുണ്ട്. ധ്യാൻ പല വള്ളികളും (വിവാദങ്ങളും) വെച്ചിട്ടുണ്ടെങ്കിലും ഇതിപ്പോൾ പാൻ ഇന്ത്യൻ വള്ളിയായി മാറിയെന്നാണ് മലയാളികളുടെ കണ്ടെത്തൽ. “ഇനി നിനക്ക് തമിഴ്നാട്ടിലേക്ക് പോകാൻ പറ്റില്ല” എന്ന് മുൻപ് നടൻ അജു വർഗീസ് ധ്യാനിനോട് പറഞ്ഞ കാര്യം ഓർമ്മിപ്പിച്ച്, അജുവിന്റെ നാക്ക് പൊന്നായെന്നും ആരാധകർ പറയുന്നു. മുൻപ് അജു പറഞ്ഞ “വിജയ് സർ മന്നിച്ചിടിങ്കേ, എൻ നൻപനിക്ക് പൈത്യം” (വിജയ് സർ ക്ഷമിക്കണം, എന്റെ കൂട്ടുകാരന് വട്ടാണ്) എന്ന ഡയലോഗും സോഷ്യൽ മീഡിയയിൽ ട്രോളായി നിറയുകയാണ്.
അതേസമയം, ധ്യാനിനെ പിന്തുണച്ചും നിരവധി പേർ രംഗത്തെത്തിയിട്ടുണ്ട്. അദ്ദേഹം തമാശയായി പറഞ്ഞ കാര്യത്തെ എന്തിനാണ് ഇത്ര ഗൗരവത്തോടെ കാണുന്നതെന്നും, മറുപടി കൊടുക്കണമെങ്കിൽ ഇങ്ങനെ തന്നെ കൊടുക്കണമെന്നും അനുകൂലിക്കുന്നവർ വ്യക്തമാക്കുന്നു. എന്തായാലും ഒരൊറ്റ അഭിമുഖത്തിലൂടെ തമിഴ് മക്കളുടെയും വിജയ് ആരാധകരുടെയും കണ്ണിലെ കരടായി മാറിയിരിക്കുകയാണ് ധ്യാൻ ശ്രീനിവാസൻ.
