പ്രധാനമന്ത്രി നരേന്ദ്ര മോദിക്കെതിരെ നടത്തിയ അപകീർത്തിപരമായ പരാമർശത്തിൽ സെലിബ്രിറ്റി മേക്കപ്പ് ആർട്ടിസ്റ്റ് ജാൻമണി ദാസിനെതിരെ രൂക്ഷവിമർശനവുമായി ഉറ്റസുഹൃത്തും അവതാരകയുമായ രഞ്ജിനി ഹരിദാസ്. ആർക്കും മറ്റൊരാളെ വ്യക്തിപരമായി അധിക്ഷേപിക്കാൻ അവകാശമില്ലെന്നും പൊതുസ്ഥലങ്ങളിൽ നിൽക്കുന്നവർ ചിന്തിച്ച് സംസാരിക്കണമെന്നും രഞ്ജിനി തന്റെ സോഷ്യൽ മീഡിയയിലൂടെ വ്യക്തമാക്കി.
നീറ്റ് പരീക്ഷാ ക്രമക്കേടുമായി ബന്ധപ്പെട്ട് ഡൽഹിയിൽ നടന്ന പ്രതിഷേധത്തിൽ രഞ്ജിനിക്കൊപ്പം ജാൻമണിയും പങ്കെടുത്തിരുന്നു. ഇതിന് പിന്നാലെയാണ് ജാൻമണി പ്രധാനമന്ത്രിക്കെതിരെ വിവാദ പരാമർശം നടത്തിയത്.
പ്രശ്നത്തിൽ രഞ്ജിനി ഹരിദാസിന്റെ പ്രധാന പ്രതികരണങ്ങൾ:
“ഇത് പറയണോ വേണ്ടയോയെന്ന് കുറേ ആലോചിച്ചു. പറഞ്ഞില്ലെങ്കിൽ ഞാൻ എന്നോടു തന്നെ ചെയ്യുന്ന തെറ്റാകും. നമുക്ക് ദൈവം തന്ന ശബ്ദം എന്തിനുവേണ്ടി ഉപയോഗിക്കുന്നുവെന്നത് വളരെ പ്രധാനപ്പെട്ടതാണ്. ജാൻമണി വലിയൊരു മണ്ടത്തരം ചെയ്തു. എനിക്ക് നല്ല ദേഷ്യം വന്നു, പറയാനുള്ളത് ജാൻമണിയോട് പറയുകയും ചെയ്തു.
പൊതുസ്ഥലങ്ങളിൽ നിൽക്കുന്നവർ ആലോചിച്ചും കണ്ടും അഭിപ്രായം പറയണം. അഭിപ്രായ സ്വാതന്ത്ര്യം മറ്റൊരാളെ താഴ്ത്തിക്കെട്ടാനുള്ള അവസരമായി എടുക്കരുത്. ഒരു റീൽ കണ്ടിട്ടാണ് അറിവില്ലായ്മ വെച്ച് ജാൻ സംസാരിച്ചത്. രാജ്യത്തെ പ്രധാനമന്ത്രിയെ കുറിച്ചാണ്, അതും അദ്ദേഹത്തിന്റെ കുടുംബത്തെ കുറിച്ച് സത്യം എന്താണെന്ന് പോലും അറിയാതെയാണ് സംസാരിച്ചത്. കുട്ടികളല്ലല്ലോ, സംസാരിക്കും മുമ്പ് ചിന്തിക്കണ്ടേ? സത്യം എന്താണെന്ന് അറിയാത്ത കാര്യങ്ങളെ കുറിച്ച് സംസാരിക്കരുത്.”
ഒരു നല്ല കാര്യത്തെ ജാൻമണി അനാവശ്യമായി രാഷ്ട്രീയവത്കരിച്ചുവെന്നും വിദ്യാർത്ഥികളുടെ പ്രതിഷേധത്തിലൂടെ നേടിയ വിജയം 24 മണിക്കൂർ പോലും ആഘോഷിക്കാൻ ജാൻമണി അനുവദിച്ചില്ലെന്നും രഞ്ജിനി കൂട്ടിച്ചേർത്തു. ജാൻമണി തന്റെ സുഹൃത്താണെങ്കിലും ഇത്തരം വിഷയങ്ങളിൽ മിണ്ടാതിരിക്കാനാകില്ലെന്നും അവർ വ്യക്തമാക്കി.
