മസ്കറ്റ്: ഒമാനിലെ വടക്കൻ അൽ ശർഖിയ ഗവർണറേറ്റിലെ വിവിധ വിലായാത്തുകളിൽ കനത്ത മഴ പെയ്തതായി കാലാവസ്ഥാ നിരീക്ഷണ കേന്ദ്രം. തുടർച്ചയായി പെയ്ത മഴയിൽ മേഖലയിലെ വാദികളും താഴ്വരകളും കവിഞ്ഞൊഴുകി വെള്ളപ്പൊക്കത്തിന് സമാനമായ സാഹചര്യമാണ് നിലവിലുള്ളത്.
ഇബ്ര വിലായാത്തിലെ അൽ ഹൈമ, ഖഫീഫ, ജാദ്യ തുടങ്ങിയ പ്രദേശങ്ങളിലും, അൽ മുദൈബിയിലെ സമദ് അൽ ഷാൻ, അൽ റൗദ, ബാദ്, ഖദ്ര ബനി ദിഫ, അൽ ഐനൈൻ, അൽ ഫതഹ് എന്നിവിടങ്ങളിലും ശക്തമായ മഴ രേഖപ്പെടുത്തി. അന്ദാം, അൽ ഫലിജ്, ഗബ്റത് അൽ വാഫി എന്നീ വാദികളിൽ വലിയ തോതിലുള്ള വെള്ളപ്പാച്ചിൽ അനുഭവപ്പെട്ടു.
ബിദിയയിലെ അൽ റാക്ക, അൽ വാസിൽ, അൽ ദാഹിർ എന്നിവിടങ്ങളിലും, അൽ ഖാബിലിലെ വാദി നാമിന് ചുറ്റുമുള്ള അരുവികളിലും ജലനിരപ്പ് ഗണ്യമായി ഉയർന്നു. ദിമ വ അത്തായീനിലെ വാദി സംഹാൻ, വാദി അൽ ഖബാഹ്, വാദി അൽ ദിറ തുടങ്ങിയ പ്രമുഖ താഴ്വരകളും നിറഞ്ഞു കവിഞ്ഞൊഴുകുകയാണ്. മഴ ശക്തമായി തുടരുന്ന സാഹചര്യത്തിൽ പെട്ടെന്നുണ്ടാകുന്ന മലവെള്ളപ്പാച്ചിലുകൾക്ക് സാധ്യതയുള്ളതിനാൽ ജലപാതകളും വാദികളും മുറിച്ചുകടക്കരുതെന്നും വാഹനമോടിക്കുന്നവരും താഴ്ന്ന പ്രദേശങ്ങളിൽ ഉള്ളവരും അതീവ ജാഗ്രത പാലിക്കണമെന്നും അതോറിറ്റി അറിയിച്ചു.
#OmanRain #NorthSharqiyah #OmanWeather #WadiOverflow #MuscatNews #GulfNews #OmanNews
