പ്രശസ്ത പാചക വിദഗ്ദ്ധയും അവതാരകയും യൂട്യൂബറുമായ ലക്ഷ്മി നായർ മകൾ പാർവ്വതിക്കും കുടുംബത്തിനുമൊപ്പം സമയം ചെലവഴിച്ച ശേഷം മാഞ്ചസ്റ്ററിൽ നിന്ന് അടുത്തിടെയാണ് കേരളത്തിൽ തിരിച്ചെത്തിയത്. യുകെ സന്ദർശന വേളയിൽ പങ്കുവെച്ച വീഡിയോകൾക്ക് താഴെ വസ്ത്രധാരണത്തെയും പ്രായത്തെയും അധിക്ഷേപിച്ചുകൊണ്ടുള്ള ചില നെഗറ്റീവ് കമന്റുകൾക്ക് തൻറെ പുതിയ വ്ലോഗിലൂടെ കൃത്യവും വ്യക്തവുമായ മറുപടി നൽകിയിരിക്കുകയാണ് താരം.
“ആരുടെയും ഹാപ്പിനസിന് വേണ്ടിയല്ല ഞാൻ ഡ്രസ്സ് ചെയ്യുന്നത്”
തന്റെ ആഗ്രഹപ്രകാരവും സൗകര്യപ്രദവുമായ രീതിയിലാണ് വസ്ത്രം ധരിക്കുന്നതെന്നും പ്രായത്തെ കുറിച്ചുള്ള ഉപദേശങ്ങൾ ആവശ്യമില്ലെന്നും ലക്ഷ്മി നായർ തുറന്നടിച്ചു.
“വേറെ ആരുടെയും ഹാപ്പിനസിന് വേണ്ടിയല്ല ഞാൻ വസ്ത്രം ധരിക്കുന്നത്. കണ്ണാടിയിൽ നോക്കുമ്പോൾ എനിക്ക് കോൺഫിഡൻസ് തോന്നിയാൽ ഞാൻ ആ ഡ്രസ്സ് ഇടും. വയസ്സിന് അനുസരിച്ച് വസ്ത്രം ധരിക്കേണ്ടത് എങ്ങനെയെന്ന് എവിടെയെങ്കിലും എഴുതിവെച്ചിട്ടുണ്ടോ? സ്ലീവ്ലെസ്സ് ഇടുന്നതൊക്കെ ഒരു വലിയ ക്രൈമാണോ?” — ലക്ഷ്മി നായർ
വസ്ത്രധാരണത്തെ കുറിച്ച് മണ്ടൻ കമന്റുകളാണ് പലരും ഇടുന്നത്. മാഞ്ചസ്റ്ററിൽ ചെന്നാൽ അവിടുത്തെ കാലാവസ്ഥയ്ക്കും രീതിക്കും അനുയോജ്യമായ വസ്ത്രങ്ങളാണ് ധരിക്കാറുള്ളത്. മനഃപൂർവ്വം അസ്വസ്ഥത ഉണ്ടാക്കാൻ ശ്രമിക്കുന്ന ചിലർ സ്ഥിരമായി ഇത്തരം അഭിപ്രായങ്ങൾ ഉന്നയിക്കാറുണ്ടെന്നും താരം കൂട്ടിച്ചേർത്തു.
“നാണമില്ലേ എന്ന് ചോദിക്കുന്നവരോട് തിരിച്ച് ചോദിക്കാനുണ്ട്”
‘ഇത്രയും വയസ്സായില്ലേ, ഇങ്ങനെ വസ്ത്രം ധരിക്കാൻ നാണമില്ലേ, ഭർത്താവും മക്കളും ഒന്നും നിയന്ത്രിക്കാനില്ലേ’ എന്നൊക്കെ ചോദിക്കുന്ന പ്രവണതയെയും ലക്ഷ്മി നായർ ശക്തമായി വിമർശിച്ചു.
സത്യത്തിൽ ഇത്തരം കാര്യങ്ങൾ ചോദിക്കുന്നവരോട് തിരിച്ച് നാണമില്ലേ എന്നാണ് ചോദിക്കാനുള്ളത്. എല്ലാവരും അവരവരുടെ ഇഷ്ടത്തിനനുസരിച്ചാണ് ജീവിക്കുന്നത്. ആരും ആരുടെയും ചെലവിലല്ല കഴിയുന്നത്. ചിലർക്ക് വെസ്റ്റേൺ വസ്ത്രങ്ങൾ ഇടാൻ ആഗ്രഹമുണ്ടെങ്കിലും അതിനുള്ള അനുവാദം ലഭിക്കാത്തതുകൊണ്ടാകാം മറ്റുള്ളവരെ കുറ്റപ്പെടുത്തുന്നതെന്നും ലക്ഷ്മി നായർ അഭിപ്രായപ്പെട്ടു.
ഓണം പ്രമാണിച്ച് 13 ദിവസം മാത്രം നീണ്ടുനിന്ന ഹ്രസ്വ സന്ദർശനമാണ് ഇത്തവണ മാഞ്ചസ്റ്ററിലേക്ക് നടത്തിയത്. ചുരുങ്ങിയ ദിവസങ്ങൾക്കുള്ളിൽ 7 വീഡിയോകൾ ചിത്രീകരിക്കാൻ കഴിഞ്ഞത് തന്റെ വിജയമായി കാണുന്നുവെന്നും താരം കൂട്ടിച്ചേർത്തു.
