തിരുവനന്തപുരം: വീര്യം കുറഞ്ഞ മദ്യത്തിന് നികുതി ഇളവ് നൽകിയ സംസ്ഥാന ബജറ്റ് നിർദേശത്തിനെതിരെ നിലപാട് കടുപ്പിക്കാനൊരുങ്ങി മുസ്ലിം ലീഗ്. നികുതി കുറച്ച തീരുമാനം യാതൊരു കാരണവശാലും നടപ്പിലാക്കരുതെന്ന് വരാനിരിക്കുന്ന യുഡിഎഫ് യോഗത്തിൽ ലീഗ് ശക്തമായി ആവശ്യപ്പെടും. മദ്യപാനത്തെ പ്രോത്സാഹിപ്പിക്കുന്ന ഒരു നയവും മുന്നണിയുടെ ഭാഗത്തുനിന്ന് ഉണ്ടാകരുതെന്നാണ് ലീഗ് നേതാക്കൾക്കിടയിൽ നടന്ന ചർച്ചയിലെ പൊതുവികാരം.
വീര്യം കുറഞ്ഞ മദ്യത്തിന്റെ നികുതി കുറയ്ക്കുന്നത് സംബന്ധിച്ച് മുന്നണിയിലോ ലീഗുമായോ യാതൊരുവിധ ചർച്ചകളും നടന്നിട്ടില്ല. ഇത്തരം സുപ്രധാനമായ നയപരമായ തീരുമാനങ്ങൾ കൈക്കൊള്ളുമ്പോൾ ലീഗ് ഉൾപ്പെടെയുള്ള ഘടകകക്ഷികളെ മുൻകൂട്ടി അറിയിക്കണമെന്ന ആവശ്യവും അടുത്ത യുഡിഎഫ് യോഗത്തിൽ ഉന്നയിക്കാൻ പാർട്ടി നേതൃത്വം തീരുമാനിച്ചിട്ടുണ്ട്.
#muslimleague#udf#liquer
