മഴക്കാലമെത്തിയതോടെ വീടിനുള്ളിൽ വളർത്തുമൃഗങ്ങളെ പരിപാലിക്കുന്നവർ കൂടുതൽ ജാഗ്രത പുലർത്തേണ്ടതുണ്ട്. അന്തരീക്ഷത്തിലെ ഈർപ്പം വർദ്ധിക്കുന്നതിനാൽ മൃഗങ്ങളുടെ രോമം, താരൻ, ചെളി തുടങ്ങിയവ വീടിനുള്ളിൽ കൂടുതൽ അടിഞ്ഞുകൂടാൻ സാധ്യതയുണ്ട്. ഇത് വീടിന്റെ ശുചിത്വത്തെയും വായുവിന്റെ ഗുണനിലവാരത്തെയും ബാധിച്ചേക്കാം. വളർത്തുമൃഗങ്ങളെ ആരോഗ്യത്തോടെ പരിപാലിക്കുന്നതിനൊപ്പം വീടും വൃത്തിയായി സൂക്ഷിക്കാൻ ശ്രദ്ധിക്കേണ്ട പ്രധാന കാര്യങ്ങൾ താഴെ പറയുന്നവയാണ്:
-
രോമം പൂർണ്ണമായി വെട്ടിമാറ്റേണ്ടതില്ല: രോമം കൊഴിയുന്നത് കണ്ട് വളർത്തുമൃഗങ്ങളുടെ രോമം പൂർണമായി ഷേവ് ചെയ്യുന്നത് ശരിയല്ല. ഇത് കാലാവസ്ഥയിലെ മാറ്റങ്ങളിൽ നിന്ന് ശരീരത്തെ സംരക്ഷിക്കുന്ന പ്രകൃതിദത്ത കവചമാണ്. ഇതിനുപകരം കൃത്യമായ ഇടവേളകളിൽ ബ്രഷ് ചെയ്ത് അധിക രോമം നീക്കം ചെയ്യുന്നതാണ് നല്ലത്.
-
താരനും വായുവിന്റെ ശുചിത്വവും ശ്രദ്ധിക്കുക: മൃഗങ്ങളുടെ രോമത്തിന് പുറമെ ശരീരത്തിലെ താരൻ, പൂമ്പൊടി, സൂക്ഷ്മാണുക്കൾ എന്നിവയും അന്തരീക്ഷത്തെ ബാധിക്കാം. വായുവിന്റെ ഗുണനിലവാരം മെച്ചപ്പെടുത്താൻ ആവശ്യമായ സാഹചര്യങ്ങളിൽ എയർ പ്യൂരിഫയർ ഉപയോഗിക്കുന്നത് പരിഗണിക്കാം.
-
കിടക്കയും സോഫയും പതിവായി വൃത്തിയാക്കുക: വളർത്തുമൃഗങ്ങൾ കൂടുതൽ സമയം ചെലവഴിക്കുന്ന ബെഡ്ഡുകൾ, പുതപ്പുകൾ, സോഫകൾ എന്നിവയിൽ രോമവും പൊടിയും അടിഞ്ഞുകൂടാൻ സാധ്യതയുണ്ട്. ഇവയുടെ വിരിപ്പുകൾ കൃത്യമായ ഇടവേളകളിൽ കഴുകി വൃത്തിയാക്കണം.
-
വാക്വം ക്ലീനർ ഉപയോഗിക്കുക: തറയിലും സോഫയിലും വളർത്തുമൃഗങ്ങൾ വിശ്രമിക്കുന്ന ഇടങ്ങളിലും അടിഞ്ഞുകൂടുന്ന രോമവും പൊടിയും നീക്കം ചെയ്യാൻ വാക്വം ക്ലീനർ ഉപയോഗിക്കുന്നത് ഏറെ ഫലപ്രദമാണ്. മഴക്കാലത്ത് ഈർപ്പം കൂടുന്നതിനാൽ ഇത്തരം ഇടങ്ങൾ പതിവായി വൃത്തിയാക്കണം.
-
പുറത്തുപോയാൽ പാദങ്ങൾ തുടച്ചുമാറ്റുക: മഴയത്ത് പുറത്തിറങ്ങി വീട്ടിലെത്തുന്ന വളർത്തുമൃഗങ്ങളുടെ കാലുകളിൽ ചെളിയും അഴുക്കും പറ്റിയിരിക്കാം. ഓരോ തവണ പുറത്തുപോയി വരുമ്പോഴും പാദങ്ങൾ നന്നായി തുടച്ച് വൃത്തിയാക്കിയ ശേഷം മാത്രം വീടിനുള്ളിലേക്ക് പ്രവേശിപ്പിക്കുക.
മഴക്കാലത്ത് വളർത്തുമൃഗങ്ങളുടെ ശരീരശുചിത്വത്തിനൊപ്പം അവ സമയം ചെലവഴിക്കുന്ന ഇടങ്ങളുടെയും വീടിനുള്ളിലെ വായുവിന്റെയും ശുചിത്വത്തിന് കൂടി പ്രാധാന്യം നൽകുന്നത് വഴി പലവിധ ആരോഗ്യപ്രശ്നങ്ങളും ഒരു പരിധി വരെ ഒഴിവാക്കാം.
