ആധുനിക അടുക്കളകളിൽ ഒഴിച്ചുകൂടാനാവാത്ത ഒന്നായി മൈക്രോവേവ് ഓവനുകൾ മാറിയിട്ടുണ്ടെങ്കിലും, അവ ഉപയോഗിക്കുന്നതിൽ പലരും ഇപ്പോഴും അശ്രദ്ധ കാണിക്കാറുണ്ട്. ഒരു നിമിഷത്തെ അശ്രദ്ധ തീപിടുത്തത്തിനോ ഓവൻ പൊട്ടിത്തെറിക്കുന്നതിനോ കാരണമായേക്കാം. മൈക്രോവേവ് ഉപയോഗിക്കുമ്പോൾ ഒഴിവാക്കേണ്ട പ്രധാന തെറ്റുകൾ ഇവയാണ്:
1. ലോഹപ്പാത്രങ്ങളുടെ ഉപയോഗം
മൈക്രോവേവിനുള്ളിൽ സ്റ്റീൽ, അലുമിനിയം പാത്രങ്ങളോ അലുമിനിയം ഫോയിലോ ഉപയോഗിക്കുന്നത് ഏറ്റവും വലിയ അബദ്ധമാണ്. ലോഹങ്ങൾ മൈക്രോവേവ് രശ്മികളെ പ്രതിഫലിപ്പിക്കുകയും ഇത് തീപ്പൊരികൾക്കും (Sparks) ഓവൻ കത്തുന്നതിനും കാരണമാവുകയും ചെയ്യും. ‘മൈക്രോവേവ് സേഫ്’ എന്ന് രേഖപ്പെടുത്തിയ ഗ്ലാസ് അല്ലെങ്കിൽ സെറാമിക് പാത്രങ്ങൾ മാത്രം ഉപയോഗിക്കുക.
2. മുട്ട പുഴുങ്ങാൻ ശ്രമിക്കുന്നത്
മുട്ട അതിന്റെ പുറംതോടോടെ ഓവനിൽ വെച്ച് പുഴുങ്ങാൻ ശ്രമിക്കരുത്. മുട്ടയ്ക്കുള്ളിലെ ദ്രാവകം നീരാവിയായി മാറുകയും പുറംതോടിനുള്ളിൽ മർദ്ദം വർദ്ധിച്ച് അത് ബോംബ് പോലെ പൊട്ടിത്തെറിക്കാനും സാധ്യതയുണ്ട്.
3. വായു കടക്കാത്ത രീതിയിൽ പാത്രം അടച്ചുവെക്കുന്നത്
ഭക്ഷണം ചൂടാക്കുമ്പോൾ പാത്രങ്ങൾ പൂർണ്ണമായും എയർ-ടൈറ്റായി അടച്ചുവെക്കരുത്. ഉള്ളിലെ നീരാവി പുറത്തുപോകാൻ കഴിയാതെ വരുന്നത് പാത്രം പൊട്ടിത്തെറിക്കാൻ ഇടയാക്കും. പാത്രം ലളിതമായി മൂടിവെക്കുകയോ നീരാവി പോകാൻ ചെറിയ വിടവ് നൽകുകയോ ചെയ്യുക.
4. വെള്ളം അമിതമായി ചൂടാക്കുന്നത്
വെള്ളം ദീർഘനേരം മൈക്രോവേവിൽ വെച്ച് ചൂടാക്കുന്നത് ‘സൂപ്പർ ഹീറ്റിംഗിന്’ കാരണമാകും. പുറമെ തിളച്ചതായി കാണുന്നില്ലെങ്കിലും പാത്രം പുറത്തെടുത്ത് അതിലേക്ക് സ്പൂണോ മറ്റോ ഇടുമ്പോൾ വെള്ളം പെട്ടെന്ന് തിളച്ചുയർന്ന് പൊള്ളലേൽക്കാൻ സാധ്യതയുണ്ട്.
5. ഓവൻ ശൂന്യമായി പ്രവർത്തിപ്പിക്കുന്നത്
മൈക്രോവേവിനുള്ളിൽ ഒന്നുമില്ലാതെ അത് ഓൺ ചെയ്യുന്നത് ഒഴിവാക്കണം. ഭക്ഷണത്തിന് ആഗിരണം ചെയ്യാൻ കഴിയാത്ത തരംഗങ്ങൾ ഓവനിലെ പ്രധാന ഭാഗമായ ‘മഗ്നട്രോണിലേക്ക്’ തന്നെ തിരിച്ചെത്തുകയും അത് ഉപകരണത്തിന് സ്ഥിരമായ കേടുപാടുകൾ വരുത്തുകയും ചെയ്യും.
6. വൃത്തിഹീനമായ ഓവൻ
ഓവനുള്ളിൽ ഭക്ഷണാവശിഷ്ടങ്ങൾ കരിഞ്ഞുപിടിച്ചിരിക്കുന്നത് തീപിടുത്തത്തിനുള്ള പ്രധാന കാരണമാണ്. ഓരോ ഉപയോഗത്തിന് ശേഷവും ഓവൻ തുടച്ച് വൃത്തിയാക്കുന്നത് സുരക്ഷിതമായ പാചകത്തിന് അനിവാര്യമാണ്.
ശ്രദ്ധിക്കുക: പ്ലാസ്റ്റിക് പാത്രങ്ങൾ ഉപയോഗിക്കുമ്പോൾ അവ ‘മൈക്രോവേവ് സേഫ്’ ആണെന്ന് ഉറപ്പുവരുത്തുക. ഗുണനിലവാരമില്ലാത്ത പ്ലാസ്റ്റിക് ഉരുകി ഭക്ഷണത്തിൽ കലരുന്നത് മാരകമായ ആരോഗ്യപ്രശ്നങ്ങൾക്ക് കാരണമായേക്കാം.
