ദുബായ്: ഇനിമുതൽ ഡ്രൈവറില്ലാ ടാക്സികൾ ബുക്ക് ചെയ്യാൻ യൂബർ (Uber) ആപ്പിലും സൗകര്യം. ബൈദുവിന്റെ ‘അപ്പോളോ ഗോ’ (Apollo Go) റോബോടാക്സികളാണ് ആപ്പ് വഴി ബുക്ക് ചെയ്യാവുന്നത്. റോഡ്സ് ആൻഡ് ട്രാൻസ്പോർട്ട് അതോറിറ്റിയാണ് (RTA) ഈ നിർണായക നേട്ടം അറിയിച്ചത്.
യൂബർ എക്സ്, യൂബർ കംഫർട്ട് എന്നിവ ബുക്ക് ചെയ്യുന്ന ഉപയോക്താക്കൾക്ക് ഡ്രൈവറില്ലാ വാഹനങ്ങൾ ലഭ്യമായേക്കും. ഇതുകൂടാതെ ആപ്പിൽ നേരിട്ട് ‘ഓട്ടോണമസ്’ (Autonomous) ഓപ്ഷൻ തിരഞ്ഞെടുത്തും യാത്ര ബുക്ക് ചെയ്യാം. ആദ്യഘട്ടത്തിൽ ഉമ്മു സുഖീം, ജുമൈറ തുടങ്ങിയ തിരഞ്ഞെടുത്ത മേഖലകളിലാണ് സർവീസ് ലഭ്യമാകുക. ഘട്ടംഘട്ടമായി നഗരത്തിന്റെ മറ്റു ഭാഗങ്ങളിലേക്കും സേവനം വ്യാപിപ്പിക്കും.
പൂർണ്ണമായും സ്വയം നിയന്ത്രിതമായി പ്രവർത്തിക്കാൻ സജ്ജമാക്കിയ, അപ്പോളോ ഗോയുടെ ആറാം തലമുറയിൽപ്പെട്ട ‘RT6’ ഇലക്ട്രിക് റോബോടാക്സികളാണ് ഇതിനായി ഉപയോഗിക്കുന്നത്. മൂന്ന് യാത്രക്കാർക്ക് ഒരേസമയം യാത്ര ചെയ്യാം. തത്സമയ വിവരങ്ങൾ അപഗ്രഥിക്കാനും സുരക്ഷിത യാത്ര ഉറപ്പാക്കാനുമായി മുപ്പതിലേറെ അഡ്വാൻസ്ഡ് സെൻസറുകൾ ഈ വാഹനത്തിൽ സജ്ജീകരിച്ചിട്ടുണ്ട്.
നേരത്തെ ദുബായ് ടാക്സി കമ്പനിയുമായി സഹകരിച്ച് അപ്പോളോ ഗോ ആപ്പിലൂടെ മാത്രമായിരുന്നു ഈ സേവനം ലഭ്യമായിരുന്നത്. നിലവിൽ ന്യൂ ഹൊറൈസൺ ലക്ഷ്വറി ട്രാൻസ്പോർട്ടുമായി സഹകരിച്ചാണ് യൂബർ ഡ്രൈവറില്ലാ ടാക്സി സർവീസ് നടത്തുന്നത്.
#Dubai #RTA #Uber #ApolloGo #Robotaxi #DriverlessTaxi #DubaiNews #TechNews #UAE updates
